Жанубий Корея прокуратураси ҳокимиятдан четлатилган Юн Сок Ёлга расман исёнда айблов қўйди.

Ёнҳап агентлиги маълумотларига кўра, у Жанубий Кореянинг собиқ мудофаа вазири Ким Ён Хён билан тил бириктириб, уруш, қуролли можаро ёки шунга ўхшаш миллий инқироз белгилари бўлмаган вазиятда ҳарбий ҳолат эълон қилиб, 3 декабрдаги намойишларникелтириб чиқаргани тахмин қилинмоқда.

Прокурорлар, шунингдек, Юн Сок Ёл депутатларнинг у эълон қилган ҳарбий ҳолатга қарши овоз беришларига йўл қўймаслик учун парламентга ҳарбий кучларни юборганини даъво қилмоқда.

Терговчилар Юн Сок Ёлни январ ойи ўрталарида ҳибсга олган эди. Президентнинг ўзи ҳибсга олинганидан кейин эълон қилинган видеомурожаатида қон тўкилмаслиги учун сўроққа келишга қарор қилганини айтди.

«Бу ноқонуний тергов бўлса-да, мен қон тўкилишини олдини олиш учун Коррупция бўйича тергов бошқармасига келишга қарор қилдим», – деганди у.

Агентликнинг аниқлик киритишича, ҳибсда сақлаш муддати тугашига бир кун қолганида президентга расман айблов эълон қилинган. Коррупция бўйича тергов бошқармаси президентга қарши айбловлар қўйиш учун қонуний ваколатга эга эмаслиги важидан ўтган ҳафта ишни прокуратурага топширди. 26 январ, якшанба куни прокурорлар Юн Сок Ёл иши бўйича кейинги қадамларни муҳокама қилиб, уни бевосита сўроқ қила олмадилар. Сеул суди бир кун аввал унинг ҳибсда сақлаш муддатини иккинчи марта узайтириш ҳақидаги илтимосни рад этди. Қонунга кўра, агар шу муддат ичида унга нисбатан айблов эълон қилинмаса, гумондор озод этилиши керак.

Энди Юн Сок Ёлнинг ҳибсдаги муддати тугашига икки кун қолганида, прокурорлар унинг айбини судда исботлашлари керак.

«У илгари ҳам мансаб ваколатини суиистеъмол қилишда айбланган эди, бироқ бу айбловлар олиб ташланди, чунки қонун амалдаги президентга исён ёки қўзғолондан ташқари ҳар қандай айбловлардан дахлсизлик беради», – деб ёзади Ёнҳап.

Эслатиб ўтамиз, Юн Сок Ёл 2024 йил 3 декабрдан 4 декабрга ўтар кечаси «Шимолий Кореяга хайрихоҳ кучларни йўқ қилиш ва конституциявий тузумни ҳимоя қилиш учун» Жанубий Кореяда ҳарбий ҳолат эълон қилган эди. Шу куни парламент қарорни бекор қилиш учун овоз берди ва бир неча соат ичида ҳарбий ҳолат бекор қилинди. Эртаси куни эса Жанубий Корея парламентидаги мухолиф партиялар президентга импичмент эълон қилиш таклифини тайёрлади ва 14 декабр куни парламент уни қўллаб-қувватлади.