18 феврал, сешанба куни Саудия Арабистони пойтахти Ар-Риёдда Россия расмий делегацияси иштирокида Украина бўйича музокаралар бўлиб ўтади.

Аввалроқ, АҚШ президенти Доналд Трамп маъмуриятининг юқори мартабали амалдорлари Россия ва Украина ўртасида тинчлик музокараларини бошлаш учун Саудия Арабистонига борганини хабар қилинган эди.

«Коммерсант»нинг ёзишича, Америка томони таркибига Давлат котиби Марко Рубио, АҚШ миллий хавфсизлик бўйича маслаҳатчиси Майк Уолз ва АҚШ президентининг Яқин Шарқ бўйича махсус вакили Стив Виткоффлар кириши мумкин. Россия томонидан эса, мамлакат ташқи ишлар вазири Сергей Лавровнинг қиролликка ташрифи кутиляпти.

Шунингдек, Bloomberg ушбу музокарада Россия президенти ёрдамчиси Юрий Ушаков ва Ташқи разведка хизмати директори Сергей Наришкиннинг иштироки ҳақида ҳам ёзмоқда.

Эслатиб ўтамиз, 14 феврал куни Доналд Трамп Саудия Арабистонида Украина келишуви бўйича учрашув ўтказилишини эълон қилган ва унда Россия ва Америка томонининг «юқори мартабали амалдорлари», шунингдек, Украина вакиллари иштирок этишини маълум қилган эди.

Россия президенти матбуот котиби Дмитрий Песков эса томонлар Ар-Риёдни Россия ва АҚШ делегациялари учрашуви учун эҳтимолий жой сифатида кўриб чиқаётганини тасдиқлади. Саудия Арабистони расмийлари ҳам етакчилар саммитига мезбонлик қилишга тайёрлигини билдирган.