Жиноят ишлари бўйича Ғиждувон тумани судида кўрилган жиноят ишида айбдор деб топилган 24 ёшли фуқаро 6 йил муддатга қамалди.

Билдирилишича, айбдор Ф.Ж. 2020 йилда ҳам Ўзбекистон Республикаси Жиноят кодексининг 109-моддаси (Қасддан баданга енгил шикаст етказиш) билан 1 йилу 6 ой муддатга ахлоқ тузатиш ишлари билан жазоланган.

Жазо муддатини ўтаб чиқиб, орадан бир йилча вақт ўтгач, 2023 йилда қўшни маҳалладан уйланган Ф.Ж. турмуш ўртоғи Р.Ж. билан ҳам тез-тез келишмовчиликка бориб турган. Оилавий жанжаллар сабаб Р.Ж. онаси О.Ш.нинг хонадонига аразлаб кетиб қоладиган одат чиқарган. Шундай ҳолат орадан бир йил вақт ўтиб, ўғил фарзандли бўлишгач ҳам юзага келган.

Бу гал онасининг уйига аразлаб кетган Р.Ж.ни қайтариб ўз хонадонига олиб келиш мақсади билан борган Ф.Ж. қайнонаси ва қайнотасининг қаршилигига дуч келган. Икки ўртада ҳақорат ва жанжал бошланган.

Жаҳлланган куёв қайнонаси О.Ш.нинг уларнинг оилавий ишларига доимий аралашаверишидан чарчаганини дўқ-пўписа билан айтган. Жаҳл устида ҳовлидаги кроват устида бўлган ошхона пичоғи билан унга ташланган. Пичоқни аввалига қайнонасининг қорин қисмига, кейин чап бўйин соҳаси, чап елка соҳаси, сўнгра ўнг елка соҳасига зарб билан урган. О.Ш.нинг ҳаёти ва соғлиги учун хавфли бўлган ҳаракатини яна давом эттирмоқчи бўлганида, қайнотаси ва отаси томонидан ушлаб қолинган.

Оғир тан жароҳати олган қайнона туман марказий шифохонасида ички ва ташқи қон йўқотиши оқибатида вафот этган.

Суд ҳукмига кўра, жиноят кодексининг турли моддалари билан айбланган Ф.Ж. 6 йил муддатга озодликдан маҳрум қилинган. Жазони умумий тартибли колонияларда ўташи белгиланди.