Муҳандис Оқиловни бошқарма бошлиғи ҳузурига чақиртиришди.

Қабулида ёш йигитчани кўрган бошлиқ унинг саломига ҳам эътибор бермай писанда қилди:

– Бўлим бошлиғингиз билан нега чиқишолмаяпсиз?

– Мени иш билан етарли таъминламагани учун.

– Хизмат вазифангизда нима иш қилишингиз кўрсатилган.

– Албатта, лекин бу ишни қилиш учун ярим соат кифоя.

– Ишингизни ярим соатда бажариб, марҳамат, қолган вақтда ўз устингизда ишланг.

– Шундай қилдим.

– Хўш?

– Бўлимда иш олиб бораётган олти кишининг ишини бир киши бемалол бажариши мумкинлигини аниқладим.

– Қисқартиришни таклиф этмоқчимисиз?

– Нафақат бизнинг бўлимда...

– Хўш?

– Ҳисобхонада ўн иккита хотин-қиз эртадан кечгача асосан лақиллаб ўтиришади. Уларга бир йилда миллион сўмдан зиёд маош тўланаркан. Шунча маблағнинг чорагига электрон-ҳисоблаш машинаси олинса, ўша ўн иккита чўт ташловчини битта яхши мутахассисга алмаштириш мумкин бўлади.

– Яна сизда қандай таклифлар бор?

– Янами? Яна, масалан сизнинг ишингизни олсак…

– Менинг ишим?.. Бўлди етар. Таклифларингизни ўрганиб чиққанмиз. Бўлимингизда қисқартириш бўлади. Энг ёш ва бўлимга янги қабул қилинганингиз учун ишдан сиз қисқарасиз. Боринг, рухсат сизга.

Менинг ишимни олармиш, тирмизак...

Хуршид Нуруллаев