Нетаняху гаровга олинганларни озод қилиш учун ҲАМАС олдига ултиматум қўйди. 

Исроил Бош вазири Бинямин Нетаняху, агар ҲАМАС гуруҳи анклавда гаровга олинганларни шанба куни (15 феврал) тушга қадар қайтармаса, Исроил армияси Ғазо секторидаги жангларни қайта бошлашини айтди.

«Агар ҲАМАС шанба куни тушдан кейин гаровга олинганларни қайтариб бермаса, ўт очишни тўхтатиш режими тугайди ва ХАМАС ниҳоят мағлубиятга учрагунига қадар армия шиддатли жангларни давом эттиради», деди Нетаняху ҳарбий Вазирлар Маҳкамаси аъзолари билан учрашувдан сўнг эълон қилган баёнотида.

Аввалроқ АҚШ президенти Доналд Трамп ҲАМАСдан барча гаровга олинганларни шанба куни тушгача озод этишни талаб қилган эди, акс ҳолда у Ғазо «жаҳаннам»га айланиши билан таҳдид қилган. «ҲАМАС нима демоқчи эканлигимни тушунади», деди у.

Бир кун аввал жангарилар Исроил ўт очишни тўхтатиш келишуви шартларига риоя қилмаётганини эълон қилиб, асирдаги исроилликларни гаровга олиш ва уларни фаластинлик асирларга алмаштиришнинг навбатдаги босқичини кечиктириш билан таҳдид қилган эди. Исроил, ХАМАСнинг ҳаракатлари келишувни бузганини айтди.