Дональд Трамп АҚШ президенти сифатида фаолиятга киришганидан кейин амалга ошираётган ўзгаришлар таҳлилчилар томонидан турлича баҳоланмоқда.

Бир муддат аввал Ҳарвард университетида докторлик диссертациясини ҳимоя қилган ватандошимиз Ботир Қобилов Оқ уй маъмурияти қўл ураётган ўзгаришларга муносабат билдириб, гўё АҚШни Россия босиб олгандек таассурот уйғонаётганини таъкидлади.

«Бу администрациядан чиқаётган кундалик янгиликларни кўриб АҚШни ташқи душман босиб олиб ичкаридан ҳамма нарсани бузишни бошлагандек. Бошқачасига талқин қилиб бўлмайди. Айтайлик, мисол учун Россия АҚШни босиб олганда у нима қилган бўлар эди?

- АҚШ иқтисодиётини чўктирадиган барча ҳаракатлар, шу жумладан, тарифларни оширарди (Мексика ва Канадага аҳмоқона тарифлар), арзон ишчи кучларини мамлакат иш бозоридан қувиб чиқарарди (иммигрантлар), давлат хизматларини ва ижтимоий нафақани қисқартирган бўлар эди (DOGE қилаётган ишлар).

 - Дўстона мамлакатлар билан орани узар эди, Европадан узоқлашар эди.

 - Россияга АҚШ қўйган иқтисодий санкцияларни бекор қилар эди (бугунги янгиликларга кўра АҚШ шу санкцияларни бекор қилиш ҳаракатида – мутлақо абсурд янгилик).

 - АҚШни БМТ, НАТО ва бошқа халқаро ташкилотлардан чиқариб ташлар эди (жараёнда).

 - Украина ўзи урушни бошлади деб ёлғон тарқатар, унинг президентини камситишга уринар ва Украинага АҚШ юборадиган (Конгресс тасдиқлаган) ҳарбий ёрдамни тугатар эди (бугун Трамп шундай қарор чиқарибди).

 - Кабинетга россияпараст бўлган амалдорларни тайинлар эди (масалан, Тулси Габбардни разведка бошлиғи қилиб тайинлагани Путиннинг ҳам тушига кирмаган, менимча).

 - Долларга қарши қандайдир альтернатива чиқаришга уринар эди (Оқ уй ҳозир криптонинг энг катта промоутери).

 - ...

 - ва ҳоказо. Бу рўйхатни ҳар куни тўлдириб борса бўлади.

Кейингиси нима, Аляскани Россияга бериб юборайлик дейдими? Ёлғон тарқатишга уста маслаҳатчиси Маск орқали Аляскада сайлов ўтказайлик, бир пайтлар Аляска бизга адашиб ўтиб қолган дейдими?»  – деб ёзди иқтисодчи Б.Қобилов Телеграмдаги «Uzbekonomics» каналида.

Аввал хабар берганимиздек, президент Трамп Украинага ҳарбий ёрдамни мамлакат раҳбарияти «тинчлик тарафдори» эканини намойиш қилмагунча музлатиб қўйишни буюрди.

Европадаги сиёсатчилар Вашингтон Украина масаласида Москвага ён беришга уринаётганини хиёнат деб баҳоламоқда.

АҚШ вице-президенти Жей Ди Вэнснинг 14 февраль куни хавфсизлик бўйича Мюнхен анжуманидаги нутқи ҳам Европа сиёсий етакчиларида ваҳима уйғотгани маълум.

«Европага нисбатан таҳдид борасида Россия, Хитой ёки бошқа ташқи кучлардан хавотирим йўқ. Мени хавотирга солаётган жиҳат, ички таҳдидлар – Европанинг АҚШ билан уни муштарак этган айрим муҳим қадриятлардан чекинишидир», – деган эди Трампнинг муовини ўшанда.

Трамп маъмурияти яқин иттифоқчиси Канада ҳамда Мексикага қарши ҳам «уруш очди»: ушбу икки давлатдан келаётган товарларга бож тўлови 25 фоизга оширилди.

Январь ойида президентлик лавозимига киришган Трамп жамоаси икки миллионга яқин давлат хизматчисига сентябрь ойига қадар маошни сақлаб қолиш эвазига ихтиёрий равишда ишдан бўшашни таклиф қилган эди. Оқ уй шу тариқа штатларни қисқартириш ва Трамп сиёсий дастурини дастакламаётган ходимлардан воз кечишни кўзлаган.

Бюрократияни кескин қисқартириш кампанияси доирасида бир ҳафтада 9500 дан зиёд амалдор ишдан айрилган.