AҚШнинг собиқ президенти Дональд Трамп жияни Мэри Трамп ва The New York Times газетасини 2018 йилда оиласининг бойлиги ҳақида маълумот чоп этилган мақоласи учун судга берди. Бу ҳақда Associated Press (AP) хабар бермоқда.

Нью-Йорк штати судига берилган даъвода сиёсатчи қариндошини Трамп отасининг меросига тегишли солиқ ҳужжатларидан маълумотларни ошкор қилиб, 2001 йилдаги келишув шартномасини бузганликда айблаган. Унинг фикрича, аёл ўч олиш ва сиёсий ҳолатига таъсир ўтказиш ниятида бу ишга қўл урган. Aгентлик маълумотларига кўра, меросни текшириш жараёнида Мэри Трампнинг қўлига махфий маълумотларга эга бўлган 40 минг саҳифадан ортиқ молиявий ва юридик ҳужжатлар келиб тушган.

Шу билан бирга, The New York Times ва газета журналистлари Сюзанна Крейг, Дэвид Барстоу ва Рассел Бюттнер ўз манфаати йўлида маълумот олиш учун Трампнинг жиянига босим ўтказишда айбланмоқда.

Даъвода таъкидланишича, журналистлар бу маълумотларни ошкор қилиш тақиқланганидан хабардор.

Собиқ давлат раҳбари айбланувчилардан 100 миллион доллар товон пули талаб қилган.