Набира ўзининг бобоси ва бувисини пул учун шафқатсизлик билан ўлдирди: жасадлар бир ой бочкада ётди, у эса машиналар ва қимматли буюмларни сотди.

2025 йилнинг 3 январ куни Россиянинг Самара  шаҳри собиқ мэри Виктор Тархов 77 ёшга тўлди. Байрамни у рафиқаси билан Россияга қайтиб нишонлашга қарор қилди. Уларнинг вақтлари кўпроқ хорижда ўтарди.

Тарховлар Самара шаҳридаги Вилоновская кўчасида хонадонга эга эдилар. Улар аэропортдан тўғри шу ерга йўл олдилар. Кириш жойида камералар уларнинг сумкалар билан уйга кирганини қайд этди… ва шундан кейин бедарак йўқолишди.

Дастлаб, бу ҳеч кимни хавотирга солмади. Виктор Тарховнинг танишлари ундан SMS хабарлар олиб турдилар: «Озгина бетоб бўлиб қолдик, хотинимнинг аҳволи унчалик яхши эмас». Аммо кейин дўстларидан бири шубҳаланиб, полицияга мурожаат қилди.

Шубҳалар асоссиз эмас эди. 5 феврал куни (орадан бир ой ўтиб) кечқурун маълум бўлди: Виктор Тархов ва унинг хотини шафқатсизлик билан ўлдирилган. Жасадлар парчаланиб, сассиқ ҳид чиқмаслиги учун пластик бочкаларга солиб қўйилган. Жиноятда гумон қилинган шахс – марҳумларнинг 30 ёшли набираси Екатерина Бельская.

Қотиллик нима учун содир бўлди?

Ҳуқуқ-тартибот органлари ҳали ҳеч қандай расмий тафсилотларни ошкор қилмаяпти. Екатерина терговда гувоҳлик беришдан бош тортган. Аммо оммавий ахборот воситаларида баъзи маълумотлар пайдо бўлди.

Қайд этилишича, Бельская бобоси ва бувисининг уйига меҳмонга келган. Улар ўртасида жанжал чиққан бўлиши мумкин. Пул масаласида тортишганми? Ҳеч ким аниқ жавоб беролмайди, бироқ факт – Катя уларни ўлдирган. Аввалига уларни отиб ташлагани айтилган эди, кейин эса калтаклаб ўлдиргани ҳақида хабар тарқалди.

Сўнг воқеалар ҳақиқий жиноий сериалга айланди. Бельская интернет орқали пластик бочкалар буюртма қилди ва жасадларни шу бочкаларда сақлади. Маълум вақт ўтиб, уларни қисмларга бўлиб, қора пакетларга солиб, турли жойларга ташлаб келган.

Шу билан бирга, у ўз молиявий муаммоларини ҳал қилишга киришди. Баъзи манбаларга кўра,  бобосининг «Toyota RAV4» автомашинасини сохта ишончнома билан сотган. Шундан сўнг, уйдаги қимматбаҳо иконаларни ҳам пуллаган.

Буларнинг барчасини полиция аниқлади ва шу асосда Екатерина қўлга олинди. Кўп ўтмай, хонадонда жиноят излари топилди.

Екатерина Бельская ким эди?

У ёшлигидан бойлик ва ҳашамга ўч эди. Унга пулдан бошқа нарса қизиқ эмасди. У ўқиш даврида ичкиликка берилган, қимматбаҳо кийимлар ва зийнатларга қизиққанди.

Шунингдек, полиция унинг қарзга ботганини ҳам аниқлади. Инсайдерлар бу қарзлар қимор ва наркотиклар билан боғлиқ эканини тахмин қилишмоқда.

Екатерина ёлғиз ҳаракат қилганми?

Ҳозирда тергов давом этмоқда. Агар унинг шериги бўлса, уни топиш керак бўлади. Ҳозирча эса Бельская 2 ойга қамоққа олинган.

Бу даҳшатли ҳодиса ҳали кўп сирларни очиши мумкин.