Bokschimiz yarimog‘ir vaznda mutlaq jahon chempioni Artur Beterbiyev hamda sobiq chempion Dmitriy Bivolning revansh jangi oqshomida ringga ko‘tariladi.

2025 yilning 22 fevral kuniga belgilangan ushbu katta boks oqshomining rasmiy posteri ham e’lon qilindi. Markaziy jang Artur Beterbiyev va Dmitriy Bivol o‘rtasida kechadi. Bu revansh maqomidagi jang bo‘ladi. Ilk jangda Beterbiyev hakamlar qaroriga ko‘ra g‘alaba qozongan va bu e’tirozlarga sabab bo‘lgandi. Turki Al ash-Sheyx e’tirozlarga javoban tezda revansh jangini tashkil qilmoqda.

Ahamiyatlisi, Isroil Madrimov Ar-Riyoddagi yulduzli boks oqshomida o‘zining yana bir katta jangini o‘tkazadi. Hamyurtimiz amerikalik mashhur bokschi, birinchi o‘rta vazn toifasida vaqtinchalik WBC chempioni Verjil Ortisga qarshi ringga ko‘tariladi.

Shuningdek, Saudiyadagi boks oqshomida superog‘ir vazn toifasida amaldagi IBF chempioni britaniyalik Daniel Dyubua sobiq WBO chempioni Jozef Parkerdan kamarini himoya qiladi.

Eslatib o‘tamiz, Isroil Madrimov ushbu chempionlik jangiga qadar dekabr kuni Saudiya Arabistoni poytaxti Ar-Riyod shahrida bo‘lib o‘tadigan katta boks oqshomida ukrainalik Sergey Bogachuk bilan bahslashadi.