Жаҳон соғлиқни сақлаш ташкилоти иштирокида ўтказилган тадқиқот шуни кўрсатдики, дунё бўйлаб миллиарддан ортиқ одам ортиқча вазнга эга. Охирги 30 йил ичида бу кўрсаткич тўрт баробардан кўпроқ ошди.

Шундай қилиб, 1990 йилда сайёрамизда 226 миллион семиз катта ёшлилар, ўсмирлар ва болалар бор эди. 2022 йилда улар аллақачон 1,038 млрд.га етди. 

ЖССТ вакилларининг таъкидлашича, семиз одамлар сони башорат қилинганидан анча тез ўсиб бормоқда. Илгари миллиард одам сонига 2030 йилгача эришиб бўлмайди, деб ишонилган эди.

Тадқиқот муаллифлари 190 мамлакатдан олинган маълумотларни таҳлил қилган.

Уларнинг айтишича, 504 миллион аёл ва 374 миллион эркак семириб кетган. Аёллар орасида семириш даражаси 1990 йилдан буён икки баравардан кўпроқ (18,5 фоизгача), эркаклар орасида эса деярли уч баробар (14 фоизгача) ошди. Семириб кетган болалар ва ўсмирлар сони 31 миллиондан 159 миллионгача ошди.

Семизликнинг энг юқори ўсиши Яқин Шарқ, Шимолий Африка, Кариб денгизи, Полинезия ва Микронезияда кузатилган.

«Бу мамлакатларда семизлик даражаси кўплаб саноати ривожланган, даромади юқори бўлган мамлакатларга қараганда юқори», - дейилади тадқиқотда.

Олимлар семизлик ва нотўғри овқатланиш ўртасида бевосита боғлиқликни қайд этдилар. Уларнинг фикрига кўра, озиқ-овқат тизимларида жуда тез ўзгаришлар юз берди ва ўзгаришлар яхши томонга эмас. Семириб кетиш фақат бой мамлакатлардаги муаммодан глобал муаммога айланди.

Муаллифларнинг таъкидлашича, семириб кетиш юрак-қон томир касалликлари, диабет ва саратоннинг айрим турларидан ўлим хавфини оширади. Бу, шунингдек, коронавирус пандемияси даврида ўлим даражасининг ошишига ҳисса қўшди, деб хабар беради Lancet нашри.