ҲАМАС Исроил томонидан фаластинликларга нисбатан «ҳар қандай тажовузнинг кучайиши» гаровга олинганларнинг бир қисми ҳаётини хавф остига олиб келишини маълум қилди.

ҲАМАС ҳаракати, агар Исроил Ғазо секторида жангларни қайта бошласа, гаровга олинганларнинг бир қисмини ўлдириш билан таҳдид қилган.

«Биз босқинчиларнинг оилалари ва барча манфаатдор томонларни гаровга олинганлар ҳали ҳам тирик эканлигидан огоҳлантирамиз ва халқимизга қарши ҳар қандай тажовуз авж олиши, аввал ҳам содир бўлганидек, гаровга олинганлардан бирининг ўлимига олиб келиши мумкин», – дейди ҲАМАС вакили Абу Убайда 6 март, пайшанба кунги видеомурожаатида.

Исроил расмийларига кўра, Ғазодаги ҳаракат аъзолари 59 нафар гаровдагилар (24 нафари тирик, 35 нафар исроилликнинг эса жасади)ни ушлаб туришда давом этмоқда. Қайд этилишича тирик асирлар орасида Исроил ва Германия фуқаролигига эга ёш ҳарбий ҳамда Таиланд фуқароси ҳам бор.

Эслатиб ўтамиз, январ ойи ўрталарида Исроил ва Фаластиннинг ҲАМАС ҳаракати Миср, Қатар ва АҚШ воситачилигида Ғазода ўт очишни тўхтатиш режимини жорий этишга келишиб олди ва бу келишув 19 январдан кучга кирди. Келишувни амалга оширишнинг биринчи босқичи 1 март куни якунланди. Келишувнинг биринчи босқичи доирасида 33 нафар исроиллик гаровга олинган, жумладан саккиз кишининг жасади ўз ватанларига қайтарилди. Бунинг эвазига Исроил 1500 дан ортиқ фаластинликни қамоқдан озод қилди.

Исроил ва ҲАМАС ўртасидаги сулҳнинг биринчи босқичи 1 март куни якунига етди, бироқ томонлар ҳалигача келишувни узайтириш бўйича келишмаган. Исроил, агар Фаластин ҳаракати гаровга олинганларни озод этишда давом этмаса, ҲАМАСга, жумладан, жанговар ҳаракатларни тиклаш орқали босимни оширишга тайёрланмоқда.