Бугун, 16 март куни «Unicon.uz» биносида «Hilol-nashr» матбаа-нашриёти билан ҳамкорликда китоб ярмаркаси ўтказилди. Мақсад – «Unicon.uz» ходимларининг китобхонлик маданиятини юксалтириш, нутқ маданиятини ўстириш ва мутолаани тарғиб қилишдир.
Ярмаркада «Hilol-nashr» матбаа-нашриётининг сўнгги беш йилда нашр қилинган китоблари ходимлар учун чегирмали нархларда сотилди. Эътиборлиси, «Unicon.uz» ходимлари томонидан диний, илмий-оммабоп, тарбиявий ва болалар учун мўлжалланган китоблар катта қизиқиш билан харид қилинди.
– Китоб ярмаркасини ўтказиш корхонамизда одат тусига кириб боряпти, – дейди «Unicon.uz» ходими Ҳабиба Расулова. – Жорий йилнинг 22-28 феврал кунлари «Sharq ziyokori» нашриёти ва китоб маркази вакиллари билан ҳам китоб ярмаркаси ташкил этилган эди. Корхонамизда китоб ўқимайдиган ходимнинг ўзи йўқ. Нашриёт ходимларининг қўли-қўли тегмаётганидан ҳам буни билиш мумкин. Ярмаркадаги нархлар ҳам чегирмали. Ходимлар фақат ўзи учун эмас, оила аъзолари, болалар учун ҳам адабиётлар харид қилишмоқда.