Германияда Алишер Усмоновга қарши очилган жиноий иш 4 млн евро тўлов эвазига тўхтатилди. Бу ҳақда BILD нашри хабар берди.

Хабарда айтилишича, россиялик миллиардер 88 та ҳолат бўйича пул ювишда айбланаётган эди. Алишер Усмоновнинг адвокатларига кўра, у айбига иқрор бўлмаган, унинг жиноий терговни тўхтатиб туришга розилилик бериши «ўзига қарши қўйилган жиноий айбловларга иқрорлигини англатмайди, чунки «Бош прокуратура томонидан олиб борилган терговда айблов бўйича далиллар топилмаган».

Бош прокуратуранинг Франкфурт-Майндаги вакили Георг Унгефук шундай баёнот берди:

«Россиялик 71 ёшли тадбиркорга нисбатан олиб борилаётган жиноий даромадларни қонунийлаштиришга уриниш бўйича тергов 4 млн евро тўлов эвазига 2024 йил 11 октябрда айбланувчининг розилиги билан вақтинча тўхтатилди.

Германия Жиноят-процессуал кодексининг 153а-моддаси қоидаси судлар ва прокурорларга муайян шароитларда жиноий таъқибни тўхтатиш имконини беради. Бунда жамоат манфаатлари қатор шартлар бажарилиши эвазига таъминланиши мумкинлиги ва айбловларнинг жиддийлиги бунга зид келмаслиги ҳисобга олинади. Барча шартлар бажарилса, тергов бутунлай тўхтатилади.

Айбланувчининг хатти-ҳаракатлари Германия ва Гессен ерига ҳамда германиялик ҳеч бир жисмоний ёки юридик шахсга молиявий зиён етказмаган, гумон қилинаётган жиноятлар анча аввал содир бўлган».