Dunyo bo‘ylab ob-havo prognozini taqdim etish bilan shug‘ullanuvchi AccuWeather kompaniyasi AQShning Los-Anjeles shahrida davom etayotgan yong‘inlar keltirgan iqtisodiy zarar bo‘yicha bahosini yangiladi.

Unga ko‘ra, dahshatli yong‘inlar keltirgan moddiy zarar 250–275 milliard dollar deb baholanmoqda.

Avval xabar berganimizdek, AccuWeather shirkati Los-Anjelesdagi yong‘inlardan ko‘rilgan zarar va iqtisodiy yo‘qotishlar 52–57 mlrd dollarga yetishini ma’lum qilgandi.

Joriy yil 7 yanvar kuni Los-Anjeles shahri va unga tutash hududlarda boshlanib, bir haftadan buyon davom etayotgan yong‘in kuchli shamol tufayli juda katta hududda yoyildi. Tabiiy ofat oqibatida kamida 24 kishi halok bo‘ldi, 150 ming kishi xavfsiz hududlarga ko‘chirildi. 

Oq uy ma’muriyati ham tabiiy ofatga uchragan Los-Anjelesni tiklash uchun o‘nlab milliard dollar mablag‘ ketishini tan olgan.

Prezident Jo Bayden tabiiy ofat oqibatlarini bartaraf etish uchun Kaliforniya shtatiga qo‘shimcha federal ko‘mak berilishini aytgan.

Yong‘indan jabr ko‘rganlarga bir martalik 700 dollardan ko‘mak tarqatiladi. Hozirga qadar 6000 kishi ushbu yordamni olgan.

Oq uy ko‘mak uchun barcha imkoniyatlar ishga solinishiga va’da bergan.

Ma’lumotlarga ko‘ra, Pasifik-Paliseydsda yong‘in 14 foiz, Pasadenada 33 foiz, Silmarda 95 foiz, Venturada 100 foizga nazoratga olingan.

20 yanvardan AQSh prezidenti vazifasini bajarishga kirishayotgan Donald Tramp Los-Anjeles okruglaridagi vaziyatni bomba portlashi oqibatlariga qiyoslagan. U, shuningdek, Bayden ma’muriyatini favqulodda vaziyatlar tizimiga yetarli e’tibor qaratmaganlikda ayblagan.

Los-Anjelesdagi yong‘in tepalikdagi mashhur Hollywood yozuvigacha yetib bordi. Taniqli shaxslar, xususan, AQSh prezidentligi uchun kurashgan Kamala Harrisning qarorgohi, aktyorlar Ben Afflek, Tom Henks, qo‘shiqchi Riannaning uylari o‘t ichida qoldi. Malibuda aktyor va qo‘shiqchi Peris Hiltonga tegishli uylardan biri yonib kulga aylandi.

Yonib ketgan uyi suratlarini ko‘rsatgan aktyor Mel Gibson o‘t o‘chiruvchilarga suv yetishmaganini «atayin uyushtirilgan harakat» degan iddaoni ilgari surdi.