Fransuz meteorologlari bugun, 26-iyul kechki payt Parijda sharros yomg‘ir yog‘ishini prognoz qilishdi. Bu XXXIII Yozgi olimpiada o‘yinlarining rasmiy ochilish marosimi paytiga to‘g‘ri keladi.

«Kechki Parij bir necha soatgacha tabiat hodisasi qurshovida qoladi. 26-iyul tongida yomg‘ir kutilyapti va afsuski, u kechga borib kuchayadi. Soat 18 dan 19 gacha yog‘ingarchilik umumiy miqdori sezilarli — 25-30 mm gacha bo‘ladi. Solishtirish uchun: bir necha soatda 15 kunlik me’yorga teng yomg‘ir yog‘adi. Bu yomg‘ir olovni o‘chira oladi (ochilish marosimida Olimpiada olovi yoqiladi — tahr.). Ancha kuchli yomg‘ir yog‘ishi kutilmoqda», — dedi meteorolog Patrik Marler.

Parij olimpiadasining ochilish marosimi bugun, 26-iyul kuni bizning vaqt bilan soat 22:30 da boshlanadi.

Olimpiadalar tarixida tantanali ochilish marosimi ilk marotaba stadiondan tashqarida, Sena daryosi bo‘yicha bo‘lib o‘tadi. Unga 320 ming tomoshabin kelishi kutilmoqda. Marosimga 100 ga yaqin davlat va hukumat rahbarlari taklif etilgan.