17-fevral kuni Oqqo‘rg‘on tumani IIBga Oxunboboyev ko‘chasidagi xonadonlarning birida yashovchi 3 nafar fuqaro vafot etganligi, 4 nafari esa «noma’lum etiologik zaharlanish» tashxisi bilan shifoxonaga yotqizilganligi haqida xabar kelib tushgan.

Ko‘rsatilgan tez-tibbiy muolajalarga qaramasdan shifoxonaga kelib tushgan bemorlarning 1 nafari vafot etgan, deyiladi Bosh prokuratura matbuot xizmati xabarida.

O‘lim sababi oziq-ovqat yoki is gazidan zaharlanish bo‘lishi mumkinligi aytilmoqda, voqea joyini ko‘zdan kechirish davomida ekspertiza tekshiruvi uchun «qovurilgan baliq» va «mosh kichira» ovqati qoldiqlari, «pomidor-bodring» tuzlamalari, olchadan tayyorlangan «kompot» qoldiqlari, xonadonda tayyorlangan «xolodets» qoldiqlari, 10 litr xajmdagi baklashkadagi suv hamda boshqa oziq-ovqat mahsulotlaridan namunalar olindi, deyiladi xabarda.

Marhumlarning o‘limi sabablarini aniqlash maqsadida sudga oid tibbiy ekspertiza tayinlangan.

Oqqo‘rg‘on tumani prokuraturasi tomonidan tergovga qadar tekshiruv o‘tkazilmoqda.