Мамлакатимиз учун янги бўлган ушбу технологияларни 24-27 октябрь кунлари Тошкентдаги «CAEx» кўргазмалар мажмуасидаги Mobiuz стендида кўриш мумкин.

Ўзбекистон ахборот-коммуникация технологиялари соҳасидаги ютуқларнинг анъанавий кўргазмаси кенг кўламли АКТ ҳафталиги – ICTWEEK 2023 доирасида ўтказилмоқда. Ҳафталик бир қатор тадбирлар (саммитлар, форумлар, бизнес учрашувлар, меҳнат ярмаркаси ва бошқалар)ни қамраб олган ҳамда «Рақамли Ўзбекистон – 2030» Стратегияси мақсадларига эришиш йўлидаги муҳим қадам бўлиши кўзда тутилган.

Мамлакатимизнинг Mobiuz мобил оператори ICTWEEKнинг фаол иштирокчиларидан бири ҳисобланади. Ҳар йили компания Ўзбекистон учун янги технологик ечимларни намойиш этишга ва уларни жорий этишга интилади. Ҳусусан, 2022-йилда Mobiuz илк марта VoLTE ва ViLTE технологияларини амалда ишлашини кўрсатган эди. Натижада эса 2023-йилнинг июнь ойида компания Ўзбекистонда биринчи бўлиб VoLTEни ишга туширди, 2023-йилнинг октябрь ойида эса барча ҳудудларда ViLTEни муваффақиятли жорий этди.

Бу йил ҳам Mobiuz ICTEXPO 2023 кўргазмасида Ўзбекистон учун инновацион технологиялар – VoWiFi ҳамда Easy Macroни намойиш этмоқда.

VoWiFi (Voice over Wi-Fi иборасининг қисқартмаси) – бу интернет орқали қўнғироқ қилиш технологиясидир. У қўнғироқларни амалга ошириш учун таянч станцияси сифатида Wi-Fi роутердан фойдаланади ҳамда уяли тармоқ сигналларини қабул қилиш қийин бўлган жойларда ва шароитларда (бинолард ичида, кўп қаватли биноларда, аҳолиси зич жойларда, ёмон об-ҳаво бўлганда ва ҳ.к.) юқори сифатни таъминлаб туради.

Easy Macro – бу уяли алоқани тезда йўлга қўйиш, тармоқ сиғимини ошириш ва абонентларни ўта сифатли сигнал билан таъминлашга ёрдам берадиган ихчам таянч станцияларидир. Easy Macro ускунаси жуда ихчам, енгил ва кўзга ташланмайди. Уни жойлаштириш учун устунлар, биноларнинг юзаси ва томлари, реклама пештахталари ва бошқалардан фойдаланишин мумкин.

ICTEXPO 2023 кўргазмасига ташриф буюрувчилар VoWiFi технологиясини бевосита кўришлари ва Easy Macro таянч станцияси намунаси билан танишиб чиқишлари мумкин. Шунингдек, компания стендида чиройли рақамлар ва операторнинг манфаатли тариф режаларини улаш, мобил алоқанинг барча масалалари бўйича маслаҳат ва ёрдам олиш мумкин.

ICTEXPO 2023 кўргазмасидаги Mobiuz стенди меҳмонлари умумий соврин жамғармаси 50 миллион сўмни ташкил қилувчи танловда ҳам иштирок этиши мумкин. Унинг шартлари Mobiuz Instagram-аккаунтида жойлаштирилган.

Кўргазма манзили: Тошкент шаҳри, Мирзо-Улуғбек тумани, «Баркамол»  МФЙ, Миллий Боғ кўчаси, 1. Мўлжал: «Янги Ўзбекистон» боғига етмасдан чапда, CAU университети ёнида.