Иқтидорли ёшларни селекция қилиш тизими янги босқичга олиб чиқилади – бу ҳақда Шавкат Мирзиёев педагог ходимлар билан бўлган учрашув вақтида таъкидлаб ўтди.

Давлат раҳбари томонидан маълум қилинишича, иқтидорли ўқувчилар учун халқаро даражада фан олимпиадаларига тайёрлаш маркази ташкил этилади. Рағбатлантириладиган халқаро фан олимпиадалари сони 18 тадан 22 тага етказилади.

Президент йиғилиш давомида нуфузли халқаро олимпиадада олтин медаль олган ўқувчига – 170 миллион сўм, кумуш медалга – 102 миллион сўм, бронза медаль учун – 68 миллион сўм мукофот пули берилишини таъкидлаб ўтди.

Шу билан бирга, ўқувчиларнинг ўқитувчилари 50 миллиондан 150 миллион сўмгача мукофотланиб, уларга бир йилда 100 фоизлик устама олиш имкони яратилади.

Илк бор халқаро фан олимпиадаларида ғолиб бўлган ўқувчилар жамоаси раҳбарларини ҳам рағбатлантириш тизими йўлга қўйилади. Ҳар бир бронза, кумуш, олтин медаль учун 5 миллиондан 15 миллион сўмгача мукофот пуллари берилади.