Туркия президенти Ражаб Тоййиб Эрдўғон мусулмон давлатларни Исроилнинг босқин, террор ва экспансия сиёсатига қарши туриш учун бир ёқадан бош чиқариб ҳаракат қилишга ундади. Бу ҳақда у диний таълим муассасаларининг Имом Хатиб номли қурултойида гапирган.

«Аввал ҳам айтганимдек, Исроил Ғазода тўхтамайди. Агар Исроил шу суръатда давом этса, Рамаллоҳни (Фаластин президенти Маҳмуд Аббос қароргоҳи жойлашган шаҳар, Ғарбий Соҳил – таҳр.) босиб олганидан кейин нигоҳини  бошқа ҳудудларга қаратади... Ливан ва Сурияга қадар келади. У ўз нигоҳини Фурот ва Дажла ўртасидаги тупроқларимизга ҳам қаратади. (Исроил расмийлари) очиқ-ошкора суратини намойиш этаётган хариталар шундан далолат беради», – деган Туркия раҳбари.

Эрдўғон 2023 йил 7 октябрдан буён Ғазода давом этаётган уруш мобайнида Исроил ҳарбийлари 40 минг нафар бегуноҳ фаластинлик, жумладан, 17 минг болани ўлдирганини кескин қоралаган. Шунга кўра, у Тель-Авивнинг террор сиёсатига қарши туриш ахлоқий ва инсоний бурч эканини урғулаган.

«Барча мусулмон мамлакатлар қачон тугаши номаълум бўлиб қолаётган Исроил истилосига қарши муштарак позицияни эгаллаши керак. Биз аввал-бошданоқ шундай чорлов билан чиққан эдик. Биз Исроил зўравонлиги, Исроил босқини ва Исроил давлат террорини тўхтатишнинг ягона чораси мусулмон давлатлар иттифоқи деб биламиз», – деган сиёсатчи.

Туркия етакчиси кучайиб бораётган босқин сиёсатига қарши Миср ва Сурия билан бирдамликни кучайтириш йўлида амалий қадамлар ташланаётганини айтган.