Жорий йил 20 февраль куни қабул қилинган «Йўл ҳаракати хавфсизлиги тизими такомиллаштирилиши муносабати билан Ўзбекистон Республикасининг Жиноят, Жиноят-процессуал кодексларига ҳамда Ўзбекистон Республикасининг Маъмурий жавобгарлик тўғрисидаги кодексига қўшимча ва ўзгартиришлар киритиш ҳақида»ги қонун билан тезлигини белгиланган тезликдан 60 км/соатдан кўпга оширганлар учун жарима миқдори оширилди.

Шу кунга қадар амалда бўлиб келган тартибга кўра, МЖтКнинг 128-3-моддасида транспорт воситалари ҳайдовчиларининг белгиланган ҳаракат тезлигини соатига 20 километрдан ортиқ, лекин 40 километрдан кўп бўлмаган катталикда ҳамда 40 километрдан ортиқ, лекин 60 километрдан кўп бўлмаган катталикда ошириб юборганлиги учун жарималар (мос равишда БҲМнинг 5 баравари ҳамда БҲМнинг 9 баравари) белгиланган эди.

Юқоридаги қонун билан эса ҳайдовчиларнинг белгиланган ҳаракат тезлигини соатига 60 километрдан ортиқ катталикда ошириб юборганлиги учун БҲМнинг 15 баробари миқдорида (5 млн 625 минг сўм) жарима солишга сабаб бўлиши белгиланди.

Эслатиб ўтамиз, қонунчиликка мувофиқ, тезлик билан боғлиқ мазкур ҳуқуқбузарликлар содир этилганда тезликни ўлчайдиган махсус ускуналар ва транспорт воситалари спидометри кўрсаткичларидаги йўл қўйилиши мумкин бўлган жами хатолар ҳисобга олиниб, уларда қайд этилган тезликдан соатига 5 километр чегириб ташланган ҳолда, маъмурий жазо чораси қўлланилади.