Россияда ҳарбий суд Қуролли кучлар Бош штаби раҳбари ўринбосари ва Бош алоқа бошқармаси бошлиғи генерал Вадим Шамаринни ҳибсга олди.

Россия ахборот агентликлари ҳибсга олиш тўғрисида қарорга асосланиб ёзишича, Шамарин ўта йирик миқдорда пора олишда айбланмоқда. 

«Коммерсант» газетаси Шамариннинг ҳибсга олингани ҳақида биринчи бўлиб хабар берди. Нашр маълумотларига кўра, Шамарин жойлашган жойда қидирув ишлари олиб борилган. Шундан сўнг, генерал сўроққа олиб кетилди.

Бу охирги ҳафталарда Россия ҳарбий раҳбариятининг биринчи шов-шувли ҳибсга олиниши эмас.

Биринчиси, мудофаа вазирининг ўринбосари Тимур Иванов бўлиб, у 1 миллиард рублга яқин пора олишда айбланганди. 

Тергов маълумотларига кўра, генерал-лейтенант Шамарин 2016 йил апрелидан 2023 йил октябригача бўлган даврда Пермдаги завод бош директори Алексей Високов ва завод бош ҳисобчиси Елена Гришинадан жами 36 миллион рубл пора олган.

Терговнинг таъкидлашича, пора «Россия Мудофаа вазирлиги эҳтиёжлари ва давлат шартномалари бўйича етказиб бериладиган маҳсулотлар ҳажмини ошириш учун» олинган.

Генерал бир кун аввал ҳибсга олинган ва суд уни ҳибсга олган. Тергов қўмитасининг аниқлик киритишича, Високов ва Гришина ҳам ҳибсда.

Шунингдек, кеча генерал Попов ҳам қамоққа олингани хабар берилганди.