Де Монфора университети (Буюк Британия) олимлари Наполеон Бонапарт ўлимининг ҳеч ким кутмаган сабабини маълум қилишди. Тадқиқотларга кўра, бу одеколон билан боғлиқ бўлиши мумкин, дея хабар берди The Daily Mail.

Наполеон 1821 йил 5 майда Aвлиё Елена оролида ҳаётдан кўз юмган. У Буюк Британия денгиз флотига таслим бўлганидан кейин олти йилни ўша ерда сургунда ўтказган.

Текширув натижасида ўлимига ошқозон саратони сабаб бўлганлиги аниқланди. Профессор Парвиз Хариснинг айтишича, онкологик касалликнинг ривожланишига императорнинг парфюмни ёқтириши олиб келган.

Маълумки, Наполеон одеколондан жуда кўп, кунига бир неча флаконлаб фойдаланган. У узоқ йиллар давомида ушбу одатини тарк этмаган, бу унинг соғлиғига салбий таъсир кўрсатган бўлиши мумкин.

AҚШда ўтказилган тадқиқотлар шуни кўрсатдики, эфир мойлари «эндокрин бузувчи» ролини бажарган бўлиши мумкин. Улар гормонларга таъсир ўтказиб, турли бузилишларни, жумладан, шишларни келтириб чиқаради.

Профессор Хариснинг сўзларига кўра, ушбу мойларнинг узоқ муддат таъсир кўрсатиши умрининг сўнгги йилларида Наполеон соғлиғининг ёмонлашганлигини кўп жиҳатдан тушунтириб беради. Собиқ император шифокорларни ёқтирмасди ва дори ичмасликка ҳаракат қиларди, аммо одеколон кўплаб касалликлардан ишончли ҳимоя эканлигига амин эди. Камида 20 йил давомида у танасини мунтазам равишда одеколон билан даволаган, бошига сепган, баъзида ҳатто ичган ҳам.

«У ҳарбий юришлар пайтида ўзи билан шишаларни олиб кетган. Қайдномаларга кўра, у кунига икки ёки учталаб шишадан фойдаланган. Замонавий одамлар эса битта шишани бир йилгача ишлатиши мумкин», — дейди илмий иш муаллифи.

Биотиббиёт олимларининг сўзларига кўра, олдинги одеколонларда алкоголь кўп бўлган. Улар Осиё ва Aфрикага сафари давомида императорни чиндан ҳам бактерия ва вируслардан ҳимоя қилган бўлиши мумкин. Aммо, алал-оқибат, узоқ вақт давомида дозани ошириб юборганлиги ўлимига сабаб бўлган бўлиши мумкин.