Сиз кўриб турган суратда АҚШ президенти Доналд Трамп собиқ президент Жо Байден Оқ уйдаги Овал кабинетда қолдирган хатни ушлаб турибди.

Fox News телеканали хатнинг мазмуни билан танишди. Айтилишича, хат қуйидаги мазмунда:

«Қадрли президент Трамп, бу муқаддас даргоҳни тарк этарканман, сиз ва оилангизга келгуси тўрт йилда энг эзгу тилакларимни изҳор этаман.

Америка халқи ва бутун дунёдаги одамлар тарихнинг муқаррар бўҳронларида бу уйдан умидвор бўлишади ва мен келгуси йиллар халқимиз учун фаровонлик, тинчлик ва иноятли давр бўлиши учун дуодаман.

Суюкли мамлакатимизга асос солинганидан буён барака улашган ва йўл кўрсатган Яратган сизни ёрлақасин ва йўл кўрсатсин».

1989 йилда Роналд Рейган Жорж Буш (Катта)га хат қолдирганидан буён бундай номалар анъанага айланган. Гарчи мактублар шахсий хусусиятга эга бўлса-да, кейинчалик жамоатчилик эътиборига ҳавола этилган.

Байден Трампга хат қолдирганини тасдиқлади. Трамп ҳам 2021 йилда Байденга мактуб қолдирганини айтганди.