GizmoChina nashri 2024-yilning eng yaxshi tugmali mobil telefonlari reytingini tuzdi — kundalik foydalanish hamda «raqamli detoksikatsiya» uchun eng yaxshi qurilmalar shular ekanligi ta’kidlanmoqda.

Reyting yetakchisi — Nokia 6310 (2024). Ekrani — 2,8 dyuym, 1450 mAs sig‘imli akkumulyatori kutish tartibida 27 kungacha ishlab beradi. Telefonda FM-modul, chaqinli kamera, «Iloncha» o‘yini bor. Bu qurilma «kontakti»da 2 mingtagacha raqamni saqlash mumkin.

Ikkinchi o‘rinda joylashgan Nokia 5310 (2024) dizayni Xpress Music telefonini eslatadi. Unda maxsus musiqa tugmalari, ikki frontal dinamik va Bluetooth orqali bog‘lanish imkoniyati bor. Akkumulyatori kutish tartibida 27 kungacha ishlashga yetadi.

Uchinchi o‘rinda ort paneli alyuminiydan tayyorlangan Nokia 230 (2024) joylashdi. Bu qurilma bilan soatlab suhbatlashish, matnli xabarlar jo‘natish, o‘yinlar o‘ynash va musiqa tinglasa bo‘ladi. Frontal va ort kamerasining yorug‘lik diodli chaqini mavjud.

Reytingda keyingi o‘rinlarda Nokia 110 4G (2024), Nokia 108 4G (2024) va JioPhone Prima 2 joylashdi.