O‘zbekiston energetika vaziri gaz quyish shoxobchalari faoliyatini nazorat qilish uchun mobil ilova ishga tushirilishini ma’lum qildi.

Vazir Jo‘rabek Mirzamahmudovning Youtube’dagi «Lolazor» podkastida ta’kidlab o‘tishicha, gap avtomobillarga yoqilg‘i quyish shoxobchalari (AYoQSh) ishini va ularda gaz mavjudligini real vaqt rejimida kuzatish imkonini beruvchi mobil ilova haqida bormoqda.

Vazir, shuningdek, qish mavsumi odatda gazga bo‘lgan talabning keskin oshishi bilan xarakterlanishi, bu aksariyat hollarda yoqilg‘i quyish shoxobchalarida resurs tanqisligi va navbatlarni keltirib chiqarishi, ushbu muammolarga esa raqamli yechim joriy etish muhimligini ta’kidladi.

«Yaqin kelajakda foydalanuvchilarga qaysi AYoQShlarda gaz borligini va qaysilarida vaqtincha yo‘qligini real vaqt rejimida ko‘rishga yordam beradigan mobil ilovani ishga tushiramiz. Bu yechim odamlarning o‘z safarlarini oldindan rejalashtirishi va yoqilg‘i quyish shoxobchalaridagi keraksiz kutishlardan qochishi uchun mo‘ljallangan», - dedi Mirzamahmudov.

Uning so‘zlariga ko‘ra, tizim butun mamlakat bo‘ylab 1200 dan ortiq yoqilg‘i quyish shoxobchasini qamrab oladi. Foydalanuvchilar nafaqat gaz mavjudligini, balki u yoki bu yoqilg‘i quyish shoxobchasiga gaz qachon kelishi haqida ham ma’lumot olishlari mumkin bo‘ladi. Bu, ayniqsa, qishning sovuq kunlarida, ya’ni gazga bo‘lgan talab ortib, ta’minotdagi uzilishlar fuqarolarga jiddiy noqulayliklar tug‘dirayotgan bir paytda juda muhim.

Vazirning aytishicha, ilova mahalliy IT-kompaniyalar bilan hamkorlikda ishlab chiqilmoqda va yaqin orada yuklab olish uchun tayyor bo‘ladi. Loyihaning asosiy jihatlaridan biri uning barcha ishtirokchilar uchun bepulligidir. Yoqilg‘i quyish shoxobchalari o‘z ob’yektlarining ishlashi to‘g‘risidagi ma’lumotlarni taqdim etib, ixtiyoriy ravishda tizimga ulanishlari mumkin.

«Stansiyalar tizimga bepul ulanishlari mumkin, bu jarayonni barcha uchun maksimal darajada qulay qiladi. Biz ulanishni majburlamaymiz, lekin ishonamizki, ushbu ilova AYoQSh va mijozlar o‘rtasidagi xizmat ko‘rsatish va o‘zaro munosabatlar darajasini sezilarli darajada yaxshilaydi», – deya qo‘shimcha qiladi Mirzamahmudov.