Футбол бўйича Аргентина терма жамоаси уч йирик турнирда қаторасига ғалаба қозониб, Испания терма жамоасининг ноёб рекордини такрорлади.

Лионел Скалони бошчилигидаги Аргентина Америка кубогини навбатдаги маротаба қўлга киритди — финалда Колумбия мағлуб этилди (1:0).

Ушбу соврин «албиселесте» учун сўнгги уч йилда учинчиси бўлди — аргентиналиклар 2021 йилда ҳам қитъа кубогини ўзлариники қилишган, 2022 йил мундиали драматик финалида Францияни мағлуб этиб, жаҳон чемпионларига айланишган.

Бунгача фақат Испания шундай ютуғи билан мақтана оларди: 2008 ва 2012 йилларда — Евро ғолиби, 2010 йилда — жаҳон чемпиони.

Америка кубоги-2024 финали Майами (АҚШ)даги «Ҳард Рок» стадионида бўлиб ўтди. Ўйин тақдири қўшимча таймларда ҳал бўлди — Лаутаро Мартинес 112-дақиқада аргентиналиклар ғалабасини таъминлаган гол муаллифи бўлди.

Эслатиб ўтамиз, 14 июл оқшомида ўтган Еврофиналда Испания Англияни 2:1 ҳисобида енгиб, тўртинчи чемпионлик билан қитъа футболи тарихидаги энг кучли миллий жамоага айланганди.