Ўрта ер денгизининг ўзига хос иқлими, табиий ва тарихий жойлашуви Аланияни машҳур сайёҳлик масканига айлантирган. Кенг пляжлари, болалар учун турфа хил ўйинлари ва бой маданий мероси билан у барча ёшдаги оила аъзолари учун кўнгилочар ва оромбахш таътилни ваъда қилади.

Турар жой

Аланияда оилавий дам олувчилар учун турли хил турар жойлар мавжуд. Кўпгина меҳмонхоналар оила учун қулайликларни таклиф қилади. Уларда болаларнинг вақтини чоғ ва мазмунли ўтказиши учун болалар клублари, сув слайдлари, ўйин майдончалари мавжуд бўлиб, уларга хурсандчилик бағишлаш мақсадида анимацион шоу каби тадбирлар ташкил этилади.
Бундан ташқари, алоҳида дачалар ва ижарага олинган виллалар катта оилаларнинг ҳар турдаги эҳтиёжларини қондира оладиган идеал турар жойлар ҳисобланади.

Пляжлар ва денгиз

Алания пляжлари оилавий ҳордиқ чиқарувчилар учун қулайлиги билан ажралиб туради. Клеопатра пляжи майин қуми ва саёз денгизи билан болалар учун хавфсиз сузиш майдонини таъминлайди. Инжеқум пляжи, номидан ҳам англаш мумкин, майин қуми ва болалар учун қулайлиги билан ҳамиша севимли соҳиллар қаторида.
Ушбу пляжларда сув спорти, пляж ўйинлари ва оилавий қатнашиш мумкин бўлган кўплаб машғулотлар мавжуд.

Қизиқарли тадбирлар

Шунингдек, Аланияда оилавий ёқимли лаҳзалар ва тассуротлар тақдим этадиган қизиқарли тадбирлар мунтазам ташкил этилади. Алания аквапарки болалар ва катталар кун бўйи дам олишлари мумкин бўлган сув слайдлари ва бассейнларга бой. Бундан ташқари, Дамлаташ ғори табиий гўзалликларга ошно бўлган сайёҳлар учун идеал экскурсия жойидир.
Аланиядаги машҳур телеферик Алания қалъасига чиқиш, ҳайратланарли манзарани томоша қилиш ва тарихий қалъани яқиндан ўрганиш имконини беради.

Маданий саёҳатлар

Аланиянинг тарихий ва маданий бойликларини ўрганиш ҳар доим қизиқарли бўлган. Алания қалъаси, Қизил минора ва Алания археология музейи каби жойлар болаларга тарихни ўрганиш учун катта имкониятлар яратади. Бундан ташқари, Алания кемасозлик заводи ва Димчайи каби жойлар ҳам ташриф буюришга арзийди.

Табиатга саёҳатлар

Аланиянинг табиий гўзалликларини кашф қилиш учун Димчайида сайр қилиши ёки Торос тоғлари сафарига қўшилиш мумкин. Дим ғори ва Алара шаршараси каби табиий мўъжизалар табиат ихлосмандлари учун айни муддаодир.
Шунингдек, Алания атрофидаги платоларда табиат қўйнида сайр қилиш ва салқин тоғ ҳавосидан баҳраманд бўлиш мумкин.

Овқатланиш ва дам олиш

Алания ресторанларининг оилалар учун мос таомномалари ва мазали турк таомлари болалар ва катталарнинг дидига мос келиши шубҳасиздир. Соҳил бўйидаги денгиз манзарали ресторанларда таомланиш ёки шаҳар марказидаги кафеларда дам олиш ўзгача завқ беради. Болалар учун махсус меню таклиф қиладиган ресторанлар ҳам мавжуд.