Туркиянинг жануби-ғарбий қисмида жойлашган Бодрум тарихий тузилмаси, қумли пляжлари ва ранг-баранг тунги ҳаёти билан ҳар йили миллионлаб сайёҳларни ўзига жалб қилади. «Эгей денгизининг марвариди» дея эътироф этиладиган бу мафтункор шаҳар ҳам дам олишни, ҳам кўнгилочар таътилни хоҳловчилар учун айни муддао.

Тарих ва маданият

Бодрум қадим замонлардан бери муҳим аҳоли пункти ҳисобланади. Қадимги Галикарнас номи билан машҳур бўлган бу шаҳарда дунёнинг етти мўъжизасидан бири бўлган Галикарнас мақбараси жойлашган.
Бодрум қалъаси ўрта асрлардан қолган ажойиб бино бўлиб, сув ости археология музейини ўз ичига олади. Ушбу музейда минтақадан топилган кўплаб қадимий артефактлар, осори-атиқалар ва чўкиб кетган кемаларнинг қолдиқлари намойиш этилади.

Ажойиб пляжлар

Бодрум ўзининг шишадек тиниқ кўрфазлари билан машҳур бўлиб, денгиз соҳили, оқ қумли пляжлари ва «мовий байроқли» қўлтиқлари билан денгизсеварларни лол қолдириб келмоқда. Битез, Гумушлук, Туркбуку ва Яликавак Бодрумдаги энг машҳур пляжлар қаторига киради.
Ушбу пляжларда қуёш ботишини томоша қилиш, сузиш ва сув спорти билан шуғулланиш мумкин.

Мазали таомлар

Бодрум ошхонаси Эгей ва Ўрта ер денгизи лаззатларини ўзида мужассам этади. Янги денгиз маҳсулотлари, зайтун мойидан тайёрланган салатлар, газаклар ва маҳаллий ўтлардан тайёрланган таомлар хўранда дидига манзур бўлиши шубҳасиз.

Бодрумдаги маҳаллий ресторанларда бу ноз-неъматлардан татиб кўриш ва айниқса денгиз бўйидаги балиқ ресторанларида овқатланиш унутилмас ўзига хос завқ бағишлайди.

Тунги ҳаёт 

Бодрум жонли тунги ҳаёти билан ҳам машҳур. Бар кўчаси деб номланувчи ҳудудда турли хил барлар, тунги клублар ва кўнгилочар жойлар мавжуд. Бодрум қалъаси ёнида жойлашган Галикарнас дискотекаси дунёдаги энг катта очиқ дискотекалардан бири бўлиб, бу ерда эрталабгача рақсга тушиш мумкин.

Табиат ва спорт фаолияти

Бодрум табиатда сайр қилиш, велосипедда саёҳатлар ва сув спорти каби кўплаб машғулотларни таклиф этади. Айниқса, Бодрум ярим оролидаги пиёда юриш йўлларида табиат ихлосмандлари учун кашф этилишини кутаётган гўзалликлар бисёр.
Шунингдек, Бодрумнинг сув ости дунёсини денгизга шўнғиш орқали кашф қилиш ёки сузиш орқали денгиздан баҳраманд бўлиш мумкин.

Харид қилиш

Бодрумда харид қилиш мумкин бўлган кўплаб жойлар мавжуд. Бодрум бозори маҳаллий ҳунармандчилик, сувенирлар ва янги маҳсулотларга лиқ тўла. Бундан ташқари, Бодрум Марина ва бозорида кўплаб бутик дўконлари ва машҳур брендларнинг дўконлари мавжуд.

Турар жой

Бодрум ҳар бир бюджет учун турар жой вариантлари билан бошқа дам олиш масканларидан буткул фарқланади. Ҳашаматли меҳмонхоналардан бутик меҳмонхоналаргача, квартиралардан ётоқхоналаргача бўлган кўплаб турар жой муқобиллари мавжуд. Денгиз бўйидаги меҳмонхоналарда қолиб, ажойиб манзарадан баҳраманд бўлиш ёхуд Бодрумнинг ички қисмларида жойлашган меҳмонхоналарда тинчроқ дам мумкин.

Мухтасар қилиб айтганда, Бодрум ўзининг тарихи, табиати, пляжлари, таомлари ва тунги ҳаёти билан оилавий ҳордиқ чиқариш учун муносиб ва ноёб маскан.