Бир пайтлар Трампни AҚШнинг энг соғлом президенти бўлишини эълон қилган, Дональднинг шахсий шифокори Харольд Борнстейн 73 ёшида ҳаётдан кўз юмди, деб ёзмоқда «New York Times».

Нашрда чоп этилган таъзияномада шифокорнинг ўлими сабаблари маълум қилинмаган.

Харольд Борнстейн Трампнинг сайловолди штаби 2015 йилда унинг имзоси қўйилган маълумотномани чоп этгандан сўнг машҳур бўлиб кетди. Тиббий ҳужжатда Трампнинг қон таҳлили «ўта яхшилиги» ва «мислсиз қувватга» эгалиги қайд этилган. Хуллас, доктор «жаноб Трамп сайланганлар орасида энг соғлом президент бўлишини» эълон қилган.

Гастроэндокринолог Борнстейн 1980 йилдан бери Трампни даволаб келган. Ундан олдин эса отаси президентнинг шифокори бўлган.

Борнстейн ўзидан бир ёш катта Трамп сайловларда ғалаба қозонгудек бўлса, расман президент шифокорига айланишидан умид қилганди. Бироқ бундай бўлмади. 2017 йилда шифокор журналистларга президент соч ўсишини тиклаш учун дори ичаётганини ошкор қилгач Трамп унинг хизматларидан воз кечди.

Кейинчалик, 2018 йилда шифокор ўша машҳур бўлиб кетган тиббий маълумотнома матнини президентнинг ўзи айтиб турганини тан олди. Лекин шу пайтгача буни рад этиб, ҳаммасини ўзи ёзганлигини таъкидлаб келаётганди.