Трамп АҚШда яшаш ва ишлаш ҳуқуқини берувчи 5 миллион долларлик «олтин карта»лар сотилишини эълон қилди.

Бу ҳақда Оқ уй раҳбари ОАВга 25 феврал куни бўлиб ўтган матбуот анжуманида маълум қилган. Таклиф қилинаётган янги дастур амалда мавжуд EB-5 инвестиция рухсатномаси визаларини алмаштириши мумкин.

Қайд этилишича, бу «кўп солиқ тўлайдиган, кўп одамларга иш берувчи, бой ва муваффақиятли» хорижликларга мўлжалланган бўлиб, 5 миллион долларга тушади.

АҚШ президенти, шунингдек, россиялик олигархларга «олтин карта»лар беришни истисно этмаган ва улар орасида «жуда яхши одамлар» борлигига шама қилган. У режалаштирилаётган дастур бўйича рухсатнома олувчиларнинг мумкин бўлган сонини 1 миллион кишига баҳоламоқда.

АҚШ Савдо вазири Говард Лутникнинг айтишича, олтин карта дастури икки ҳафта ичида ишга туширилади.

Эслатиб ўтамиз, EB-5 инвестиция рухсатномаси визалари 1990 йилда жорий қилинган бўлиб, номзодлар камида 10 киши ишлайдиган АҚШ компаниясига тахминан 1 миллион доллар сармоя киритиш лозим.