Франциянинг собиқ адлия вазири Кристиан Тобира 2022 йилнинг апрель ойида бўлиб ўтадиган мамлакат президентлиги учун сайловда номзод сифатида қатнашишини бугун, 15 январь куни расман эълон қилди.

Тобира Лионда бўлиб ўтган митингда ўз режасини очиқлади.

Кристиан Тобира роппа-роса 20 йил аввал — 2002 йилги сайловда ҳам президентлик курсиси учун курашиб кўрганди. Радикал сўллар партиясидан номзоди кўрсатилган Тобира биринчи турдан сўнг атиги 2,32 фоиз овоз тўплаган, шунда ҳам овозларнинг кўпини ўзи туғилган Франция Гвианасидан олганди. 2007 йилги уринишига эса партия ўз вакилини тақдим этмасдан Социалистлар партияси билан кучларни бирлаштиришга қарор қилгани тўсиқинлик қилганди.

Франция президентлиги учун 40 га яқин номзодлар курашиш ниятини маълум қилишди. Амалдаги президент Эммануэл Макрон президентликда қолиш ниятини маълум қилганди, бироқ бу ҳақда расман баёнот берган эмас. Номзодларни рўйхатга олиш март ойи бошига қадар якунига етади.