«Kp.ru» Украина бош вазири Алексей Гончарук истеъфога чиққани ҳақида хабар бермоқда.

Украина тарихидаги энг ёш бош вазир ўз лавозимидан кетишга ариза берди. Гончарук 2019 йилдан бери ҳукуматни бошқараётганди.

Эътиборли жиҳати, бир қанча муддат олдин интернернетда украин бош вазири Владимир Зеленский (президент)ни «иқтисодиётни тушунмасликда» танқид қилган ва гривнани қандай мустаҳкамлаш тўғрисида тушунча берган аудио тарқаб кетганди.

Ушбу ролик «Как обмануть президента» («Президентни қандай алдаса бўлади») ютуб-каналида 16 январь куни пайдо бўлди. Кейин эса Гончарук фейсбукда қуйидагиларни ёзди:

«Мен президент дастурини бажариш учун лавозимга келганман. У мен учун очиқлик ва виждонлилик намунасидир. Бироқ бизнинг президентга ҳурмат ва ишончимиз борасидаги барча гумонларни олиб ташлаш учун, мен президентга парламентга топшириш ҳуқуқи билан истеъфога чиқишим ҳақида ариза ёздим».

Маълумот учун: Алексей Гончарук 1984 йил 7 июлда туғилган (35 ёшда). 2019 йили, 34 ёшида Украина тарихидаги энг ёш бош вазирга айланганди.