Хабарлар тезкор Телеграм каналимизда Обуна бўлиш ×

Ўзганинг қотиллиги учун 27 йил қамоқда ўтирган хитойлик озодликка чиқарилди

Ўзганинг қотиллиги учун 27 йил қамоқда ўтирган хитойлик озодликка чиқарилди

Фото: «Teller Report»

Умрининг 27 йилини қамоқда ўтказган шарқий хитойлик фуқаро озод этилди. Бу ҳақда ВВС хабар берди.

Воқеа тарихи 1993 йилнинг октябрига, Цзянси провинцияси пойтахти Цзиньсянда икки нафар боланинг ўлиги топилганига бориб тақалади. Ўшанда бу болаларнинг қўшниси Чжан Юхуанни қотилликда гумон қилиб, ҳибсга олишади. 1995 йилнинг январида Наньчан суди уни айбдор деб топиб, ўлим жазоси белгилайди. Кейинчалик ҳукм бир умрлик қамоқ жазосига ўзгартирилади.

Чжан сўроқ пайти полициячилар куч ишлатганини тинмай таъкидлаб келган. Ҳеч қачон бу қилмишга дахлдорлигини бўйнига олмаган. 2019 йилнинг март ойида Хитой Олий суди ишни қайта кўриб чиқди, далиллар етарли эмаслиги боис, Чжан озодликка чиқарилди.

«Барча далилларни ўрганиб чиқдик, уларнинг биронтаси ҳам Чжаннинг бу ишга алоқадорлигини тўғридан-тўғри исботлай олмади. Прокуратуранинг таклифини қабул қилиб, уни айбсиз деб эълон қилдик», — деди Олий суд судьяси Тянь Ганлин.

Икки боланинг ҳақиқий қотили ким эканлиги ҳамон номаълумлигича қолмоқда.

Беайб қамалиб кетган Чжаннинг собиқ хотинидан (улар 11 йил аввал ажрашишган) икки нафар ўғли бор. Хотин бошқага турмушга чиқиб кетган бўлса ҳам Чжандан хабар олиб турган.

Суд ноҳақ қамалган маҳкум бадал ундиришга ҳақли эканини ҳам маълум қилди.

«Ўз мижозим билан ундириладиган бадал миқдорини гаплашиб олишим керак. Бундан ташқари, нотўғри суд жавобгарлари жазоланишига ҳам эришмоқчимиз», — деди Чжаннинг адвокати Ван Фэй.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг