Ўзбекистон Украинага Россия бомбардимонидан сўнг мамлакат энергетика тизимини тиклашда ёрдам бермоқда. Бу ҳақда АҚШнинг Небраска штатидаги республикачи конгрессмен Дон Бекон Ўзбекистоннинг АҚШдаги элчиси Жавлон Ваҳобов билан учрашувдан кейин маълум қилди.

«Дўстим Элчи Ваҳобовни кўрганимдан хурсандман. Ўзбекистон АҚШ билан қишлоқ хўжалиги савдосини кенгайтирмоқчи. Шунингдек, улар Украина энергетика инфратузилмасини йўқ қилишга қаратилган Россия бомбардимонидан сўнг Украинага энергия ишлаб чиқаришни қайта тиклашда ёрдам бераётганидан ҳам миннатдорман», – деб ёзади конгрессмен ўзининг Twitter’даги саҳифасида.

Аммо, конгрессмен Ваҳобов билан суҳбатнинг Ўзбекистон томони Украинага айнан қайси кўринишда кўмаклашаётгани ҳақидаги қисмига ойдинлик киритмаган. 

Эслатиб ўтамиз, Россия қўшинлари ўтган йил охиридан бошлаб Украинадаги энергетика ва алоқа объектларига зарба бера бошлади. Ўша пайтда Россия президенти Владимир Путин буни «Қрим кўпригининг бузилишига жавоб» деб атаган эди. 

Украина ОАВ пайшанба куни Польшада Европа Иттифоқининг янги энергия хаби – rescEU очилган бўлиб, у Украинага фавқулодда энергия ёрдами учун логистика маркази бўлиб хизмат қилиши ҳақида ёзган эди. Шунингдек, хаб халқаро ҳамкорлар ва хусусий секторга Украинага ёрдамни йўналтириш имконини беради, Европа Иттифоқи эса унинг транспорт-логистикасини тўлиқ молиялаштиради. ЕИ хабни генераторлар билан тўлдириш учун Польшага 114 миллион евро ажратган.

Аввалроқ Туркия компанияси ҳам Украинадаги энергия тақчиллигига қарши сузувчи электр станцияларини жўнатишини маълум қилган эди.