Беларуслик сиёсий шарҳловчи Артем Шрайбман нима сабабдан расмий Минск Россиядан нефт ва газ сотиб олишда имтиёзли нархдан воз кечганини тушунтирди.

Унинг таъкидлашича, Беларусь президенти Александр Лукашенко учун Россия билан интеграция қилиш ғояси ўз аҳамиятини йўқотган. «Беларусь манфаати нуқтаи-назаридан олиб қараганда, бу — йирик ғалаба. Чунки мамлакат ўз мустақиллигини йўқотиш хавфидан узоқлашди», — дейди Артем Шрайбман.

Шу билан бирга мутахассис нефт ва газга бўлган имтиёзли нархдан воз кечиш мамлакат иқтисодини соғломлаштиришини таъкидлаган. У имтиёзли нархни худди наркотикка ўрганиб қолиш билан тенглаштирган. «Нимагадир ўрганиб қолишдан аста-секин узоқлашиш одатда фойдали бўлади. Энди ҳукумат бозор муносабатларига кўпроқ эътибор беради», — дея айтиб ўтди Шрайбман.

Унинг фикрича, энди Минск ва Москва ўртасидаги муносабатлар прагматик кўриниш олади.

Эслатиб ўтамиз, кеча, 9 февралда Беларусь бош вазирининг биринчи ўринбосари Дмитрий Крутой Россиядан олинадиган нефт ва газ учун ҳеч қандай имтиёз керак эмаслиги ҳақида баёнот берган эди. Минск ҳар қандай харидни жаҳон бозори нархида амалга оширмоқчи.

Айни вақтда Беларусь ва Қозоғистон ўртасида нефт хариди бўйича музокара ўтказилаётгани хабар қилинган.