Ko‘chmanchilar sivilizatsiyasi jahon tarixida o‘chmas iz qoldirgan. Bu haqda Qozog‘iston prezidenti Qosim-Jo‘mart To‘qayev V Butunjahon ko‘chmanchilar o‘yinlarini tantanali ochilishida nutqida gapirdi.

«Buyuk dasht ko‘chmanchilari bepoyon Yevroosiyoda qadimdan yashab kelgan. Ular o‘z davrida ilg‘or texnologiyalarni joriy etib, jahon taraqqiyotiga ulkan hissa qo‘shgan. Ko‘chmanchilar besh ming yil oldin otni xonakilashtirib, dunyoni lol qilgan chavandozlar madaniyatini yaratdi. Dasht hunarmandlari qurol-aslahalarning ilg‘or namunalari va betakror zargarlik buyumlarini yasagan» – dedi Q.To‘qayev.

8 sentyabr kuni bo‘lib o‘tgan V Butunjahon ko‘chmanchilar o‘yinlarining ochilish marosimida faxriy mehmonlar qatorida O‘zbekiston prezidenti Shavkat Mirziyoyev ham qatnashdi.

Butunjahon ko‘chmanchilar o‘yinlari YuNESKOning Nomoddiy madaniy meros ro‘yxatiga kiritilgan etnik sport turlari bo‘yicha xalqaro musobaqadir. Ushbu sport tadbirida dunyoning 90 ga yaqin davlatidan 2 mingdan ziyod sportchi, jumladan, O‘zbekiston terma jamoasi ishtirok etmoqda.