AQSh mudofaa vazirligi E-130J samolyotini loyihalash va qurish uchun Northrop Grumman mudofaa-qurilish korporatsiyasi bilan qariyb 3,5 milliard dollar qiymatidagi shartnoma imzoladi.

E-130J samolyoti mamlakat yadroviy boshqaruv uchligi — AQSh prezidenti, Pentagon rahbari (mudofaa vaziri) va Markaziy qo‘mondonlikni o‘zaro bog‘lovchi Boeing E-6B Mercury havo kemasi o‘rnini egallashi kutilmoqda.

Pentagon bayonotiga ko‘ra, samolyot TACAMO jangovar aloqa tizimini zamonaviylashtirish dasturi doirasida yaratilmoqda. Yangi havo kemasi qurilishini 2034-yil dekabrida nihoyasiga yetkazish mo‘ljallangan.

Mavzuga doir: «Qiyomat kuni» samolyotini yaratishga $13 mlrd sarflanadi

AQShning «qiyomat kuni» samolyoti deya ta’riflanuvchi Boeing E-6 Mercury havo kemasi noyabr oyining boshida Ispaniyadagi Rota aviabazasiga kelib qo‘ngandi.

Ushbu samolyot AQSh harbiy-dengiz kuchlarining ballistik raketalarga ega atom suvosti kemalarini zaxira aloqa tizimi bilan ta’minlash hamda Qo‘shma Shtatlar qurolli kuchlari birlashgan strategik qo‘mondonligi uchun havo qo‘mondonlik punkti vazifasini bajaradi.