Germaniyaning sobiq prezidenti Horst Kyoler 1-fevral kuni 82 yoshida vafot etdi. U oilasi bag‘rida, uzoq cho‘zilmagan, ammo og‘ir xastalikdan so‘ng olamdan o‘tgan.

Horst Kyoler 2004–2010-yillarda Germaniya prezidenti bo‘lgan.

Horst Kyoler 1943-yilning 22-fevralida bosib olingan Polsha hududida etnik nemislar oilasida tavallud topgan. Tyubingen universitetida tahsil olgan, GFR iqtisodiyot vazirligida 1976-yildan 1981-yilgacha ishlagan. Kyoler 1990-yillardagi moliyaviy islohotlar va Germaniyani yevro joriy etilishiga hozirlashda muhim shaxslardan bo‘lgan. 1993-yildan 1998-yilgacha Germaniya omonat banklari assotsiatsiyasini boshqargan, so‘ngra Yevropa tiklanish va taraqqiyot banki prezidenti bo‘lgan. 2000–2004-yillarda Xalqaro valyuta jamg‘armasining boshqaruvchi direktori lavozimida faoliyat yuritgan.

Horst Kyoler 2004-yilda Germaniya prezidenti etib saylangan. 2009 yilda ikkinchi muddat qayta saylangan, biroq bir yil o‘tib, Germaniyaning chet eldagi harbiy missiyalari borasidagi bayonoti mojaroga sabab bo‘lgach, iste’foga chiqqan.