Xalqaro tashkilotlar G‘azo sektorida ro‘y berayotgan mislsiz insoniy fojia haqida bong urmoqda. G‘azo bo‘lgasi amputant bolalar, ya’ni jarohat tufayli qo‘l-oyog‘i kesilgan bolalarning aholi jon boshiga nisbatiga ko‘ra birinchi o‘ringa chiqdi.

2023 yil 7 oktyabrdan buyon davom etayotgan Isroil armiyasi hujumlari davomida minglab bolalar qo‘l-oyog‘idan ayrilgan, mayib-majruh holga kelgan.

Avvalroq BMT bosh kotibi Antoniu Guterrish ham G‘azodagi vaziyatni “dahshatli va halokatomuz” deb baholagan edi.

“Ayni paytda sog‘liqni saqlash tizimi butunlay yakson bo‘lgan G‘azo sektori amputatsiya qilingan bolalar soni bo‘yicha dunyoda birinchi o‘rinda turibdi. Ko‘plab bolalar (tana a’zolarini kesish) amaliyotlarini hatto anesteziyasiz o‘tkazmoqda. Biz ko‘rib turgan voqelik og‘ir xalqaro jinoyat deb malakalanishi mumkin”, – degan BMT bosh kotibi.

Isroil armiyasi HAMAS harakati hujumiga javoban G‘azo hududiga bostirib kirgandan buyon hududdagi shifoxona va tibbiy muassasalarni bombardimon qilib sog‘liqni saqlash tizimini butunlay izdan chiqardi.

TRT kanali tayyorlagan lavhada hikoya qilinishcha, 3 yoshli Jihod Mahmud ismli bola Isroilning G‘azo sektoridagi xavfsiz hudud deb e’lon qilingan mavzega hujumi oqibatida ikki oyog‘i va chap qo‘li barmoqlaridan ayrilgan. U kabi bemor bolalarga risoladagidek tibbiy ko‘mak ko‘rsatilmayapti, protez qo‘yish imkoniyati ham yo‘q.

So‘nggi ma’lumotlarga qaraganda, G‘azo sektorida 463 kundan buyon davom etayotgan urushda halok bo‘lgan falastinliklar soni 46537 nafarga, yaralanganlar esa 109571 nafarga yetdi. Halok bo‘lganlarning 17800 nafari bolalar, 12300 nafari ayollardir.

G‘azo sektorida Isroilning jangovar harakatlari davom etar ekan, mintaqada gumanitar inqiroz yanada kuchaymoqda, minglab oilalar kunlik oziq-ovqatdan mahrum qolmoqda. Xalqaro tashkilotlar Isroil G‘azo hududiga insonparvarlik ko‘magini o‘tkazishga to‘sqinlik qilayotganini tanqid qilmoqda.

Avval xabar berganimizdek, Amnesty International inson huquqlari tashkiloti Isroilning G‘azo sektorida sodir etayotgan qilmishlarini genotsid (qatliom) deb baholadi.