Президент Шавкат Мирзиёев жорий йилнинг 10 сентябр куни IT соҳасида кадрлар тайёрлаш бўйича видеоселектор йиғилишини ўтказганди. Унда бир қатор топшириқлар берилганди.

Унга кўра, жорий йил 1 октябрдан бошлаб барча ҳудудларда 14 та IT-техникумлар фаолиятини йўлга қўйиш кераклиги таъкидланганди. Ташкил этилиши кутилаётган бу техникумларда дастурий инжиниринг, ахборот хавфсизлиги телекоммуникация каби йўналишлар бўйича 8 мингга яқин ўқувчи таҳсил олиши кўзда тутилган.

Бугунги кунда техникумларни ташкил этиш учун жойларда қурилиш-таъмирлаш ишлари олиб борилмоқда.

AКТ вазири Шуҳрат Содиқов Нукус шаҳрида очилиши кутилаётган янги IT- техникумнинг тайёргарлик жараёни билан яқиндан танишди.

Учрашув давомида вазир Нукус IT техникумини 2021-2022 ўқув йилига тайёрлаш бўйича олиб борилаятган жорий таъмирлаш ишларининг охирги жараёни билан танишди. Бажарилган ишларнинг умумий ҳажми кўрсатилиб, ушбу объектнинг кейинги режалари муҳокама қилинди. Вазир техникумнинг бўлажак дизайни билан танишиб, Ўзбекистоннинг етакчи IT корхоналарида акс этган ранглар палитрасидан фойдаланиш бўйича ўз таклифини берди. Шу билан бирга, "Ўзбектелеком" AКнинг маҳаллий филиалига, ушбу объектнинг таъмирлаш ишларига кўмаклашиш бўйича топшириқ берди.

Ушбу IT-техникум қурилиш ишларининг тугатилиши жорий йилнинг 25 сентябр кунига режалаштирилган.

Бундан ташқари, AКТ вазири Ш. Содиқов ТAТУ Нукус филиали биноларидан бирига ташриф буюриб, талабаларга ётоқхона ташкил этиш учун бинолардан бирини капитал таъмирлаш жараёнини кўрди. Вазир ТAТУ филиали биноларининг ҳолати бўйича танқидий таҳлил ўтказиб, мавжуд камчиликларни тезда бартараф этиш бўйича кўрсатмалар берди.