Германиянинг Ўзбекистондаги фавқулодда ва мухтор элчиси Гюнтер Оверфельд юртимизда дипломатик фаолиятини якунламоқда. Шу муносабат билан у мамлакатимиз ҳақидаги мухтасар таассуротлари билан ўртоқлашди.

Видеолавҳада қайд этилишича, Г.Оверфельд Германия федерал президенти Франк-Вальтернинг Ўзбекистонга ташрифи ҳамда Ўзбекистон президенти Шавкат Мирзиёев ва канцлер Ангела Меркель иштирокидаги саммитни дипломатик фаолиятидаги муҳим ҳодисалар сифатида эътироф этган.

Элчи мамлакатимизда немис тилига қизиқиш ошиб бораётганини қайд этар экан, ҳатто тоғда чўпонлар ҳам немисча мулоқот қилганини ҳайрат ила баён қилган.

«Германияга бўлган улкан қизиқиш ва хайрихоҳлик ёш авлод тимсолида давом этмоқда. Бугунги кунда юз минглаб ўзбек ёшлари олмон тилини ўрганмоқда. Олмон тили ва маданиятига қизиқиш кундан кунга ортмоқда. Бу мени таъсирлантирмай қўймайди. Бунинг учун ўзбекистонликларга самимий ташаккур билдираман», – деган дипломат.

2017 йил сентябрдан буён Германиянинг Ўзбекистондаги элчиси вазифасида ишлаб келган дипломат қарийб 4 йиллик фаолиятига хотима ясамоқда. Шу муносабат билан уни 24 июнь куни Ўзбекистон ташқи ишлар вазири Абдулазиз Комилов қабул қилди. Юртимиз ташқи сиёсат идораси раҳбари Германия элчисининг икки томонлама муносабатларни сифат жиҳатдан янги босқичга кўтариш бўйича фаолиятини юқори баҳолади. Хусусан, 2019 йилда давлатлар раҳбарларининг ўзаро ташрифлари ва 2021 йил март ойида президент Шавкат Мирзиёев ва федерал канцлер Ангела Меркель ўртасидаги онлайн музокаралар давомида эришилган келишувларни амалга ошириш муҳимлиги қайд этилди.

Эслатиб ўтамиз, элчи Гюнтер Оверфельд 2019 йили «Xabar.uz»га ҳам катта интервью берган эди.