Бирлашган Миллатлар Ташкилотининг электрон ҳукумат рейтинги жаҳон мамлакатларида ахборот жамияти қанчалик тараққий этаётганини белгилаб берувчи асосий кўрсаткичлардан бири саналади.
БМТнинг электрон ҳукуматни ривожлантириш индекси (E-Government Development Index)да мамлакатларнинг мавқеи уларнинг умумий индекси асосида белгиланади. Бу индекс уч омилдан шакллантирилади:
- давлат ҳокимияти органларининг веб-ҳозирлиги (онлайн хизматлар);
- телекоммуникациялар инфратузилмаси;
- инсон капитали.
2016 йилнинг 28 июлида эълон қилинган БМТнинг янги E-Government Survey 2016 рейтингида ўз кўрсаткичларини бирмунча яхшилаган Ўзбекистон 20 поғонага юқорилиб, 80-поғонани эгаллади. Давлат онлайн хизматлари ва инсон капитали йўналишлари мамлакатимизга яхши рейтинг очколарини келтирди.
2016 йили Буюк Британия бу поғонани қатор йиллар банд этиб келган Корея Республикаси ўрнига етакчилик мақомига кўтарилди. Иккинчи ва учинчи ўринларда — Австралия ва Корея Республикаси.
2014 йилга нисбатан беш поғона йўқотган Қозоғистон 33-ўринда, саккиз поғона пастлаган Россия 35-ўринда, Беларусь ва Украина 49 ва 62-ўринларни банд этди.
Электрон ҳукуматни тараққий эттириш рейтингида тўплаш мумкин бўлган энг юқори индекс — 1. Рейтинг етакчиси — Буюк Британияда бу 0.9193 га тенг, Ўзбекистонда — 0.5434, рейтингда энг охирги 193-ўринда турган мамлакат Сомалида 0.0270 га тенг. Жаҳон бўйича бу борадаги ўртача индекс 0.4922 ҳисобланади. Айни шу охирги кўрсаткич айни пайтда ўзига хос “экватор” вазифасини бажаради: бундан паст натижага эга мамлакатларда электрон ҳукумат фаолияти қониқарсиз ёки бошқача айтганда, ярим кучи билан ишламоқда.