Уч нафар шахси номаълум кимсалар пойтахтимизнинг Юнусобод туманида Покистон фуқаросини тунаб кетишди. Воқеага айбдор дея гумонланувчилар кузатув камералари ёзувлари орқали топилган.

ИИББ томонидан маълум қилинишича, 28 сентябр куни, таҳминан соат 19.30да Юнусобод туманининг Боғишамол кўчасида номаълум шахслар Покистон фуқароси бўлган 45 ёшли А.Мга тегишли сумкани тортиб олиб, воқеа жойидан ғойиб бўлган. Сумка ичида «Samsung S6 Edge» қўл телефони, 800 минг сўм пул ва шахсий ҳужжатлар бор эди.

Ушбу ҳолат юзасидан Ўзбекистон Республикаси Жиноят кодексининг 166-моддасига (ўғирлик) биноан жиноят иши қўзғатилган. Кузатув камераларини ўрганиш жараёнида шу нарса аниқ бўлдики, зўравонлар хорижлик меҳмонни жиноятни содир этилишидан анча олдин кузатишни бошлаган.

Олиб борилган қидирув-суриштирув ишларидан сўнг гумонланувчиларнинг шахси аниқланди. Хусусан, муқаддам жабрланувчига маълум муддат таржимонлик қилган 20 ёшли Ш.И ҳодисанинг ташкилотчиси бўлиб чиқди.

Гумонланувчининг сўзларига қараганда, Покистон фуқароси ундан 400 минг сўм қарз олиб, қайтармагани етмаганидек, таржимонлик хизмати учун ҳам 200 АҚШ доллари миқдорида хизмат ҳаққини беришдан бош тортган. Шу сабабли ундан ўч олиш мақсадида жиноят содир этилган.

28 сентябр куни, таҳминан 18.30да Ш.И шериклари 22 ёшли Ш.М ва Ж.Юлар билан жиноятни режалаштирган. ИИББ ходимлари томонидан олиб борилган тезкор тадбирлар натижасида гумонланувчилар қўлга олинган. Тергов ишлари давом этмоқда.