Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Фарғоналик журналист қамоқдан чиқарилди

Фарғоналик журналист қамоқдан чиқарилди

Кеча фарғоналик журналист Усмонжон Қодиров бир неча маъмурий ҳуқуқбузарлик содир этганликда айбланиб, 15 сутка қамоқ жазосига тортилгани, бироқ ижтимоий тармоқлардаги хабарлар тўлқинидан унинг «ичкарида» ёки озодликда эканини илғаш имкониятини бермаётгани ҳақида ёзгандик.

Бугун узил-кесил маълум бўлдики, У.Қодиров, ҳақиқатдан 15 суткадага «кесилган» ва 27 май куни кеч соат 19.00дан бошлаб, жазо ўташни бошлаган. Бироқ орадан бир ярим сутка ўтиб, вазият кескин ўзгарди: у қамоқдан озод этилди.

Ўзбекистон Республикаси Олий суди матбуот хизмати раҳбари Азиз Обидовнинг «Xabar.uz»га маълум қилишича, бугун Усмонжон Қодиров Фарғона шаҳар маъмурий суди (судья С.Курбанов) қарорига нисбатан берган кассация шикояти вилоят маъмурий судида (судья У. Аҳмедов) кўриб чиқилган. Ва унга нисбатан тайинланган 15 сутка маъмурий қамоқ жазоси 2 суткага туширилиб, озодликка чиқарилган. Чунки, унинг икки кун «ўтиргани» бугун тайинланган жазони ўтаб бўлганини англатади.

Яхши хабар. Бироқ журналист қанча тез қамоққа тиқилган бўлса, шунча тезлик билан озод этилиши қатор-қатор саволлар туғдирмай қолмайди.

Англаб турганингиздек, У.Қодировга берилган 15 сутка қамоқнинг икки кунга туширилгани унинг оқланганини билдирмайди. Яъниким, суднинг кассация инстанциясида ёш журналистга тиркалган Эпидемияларга қарши кураш қоидаларини бузиш (МЖтК, 54-модда), майда безорилик (183-модда) ва Ички ишлар органлари ходимининг ўз вазифаларини бажариши билан боғлиқ қонуний талабларини бажармаслик (194-модда) каби ҳуқуқбузарликлар ўзгаришсиз қолган.

Суд унинг қилмишига иқрор ва пушаймонлиги, шунингдек, жабрланувчидан сўраган узрини инобатга олиб, жазони енгиллаштирган, холос. Энг қизиғи, суд қарорига жабрланувчи бўлмиш Фарғона шаҳар ИИО ФМБ 4-сон ИИБ профилактика инспектори М.Ҳамралиев ҳам шикоят ёзиб (?!), У.Қодировга енгиллик беришни сўраган?! Ваҳоланки, М.Ҳамралиев икки кун аввал ўтган суддан журналистга нисбатан маъмурий қамоқ жазоси беришни талаб қилган эди!

Ўтган қисқа вақт ичида профилактика инспекторига Худо инсоф берганми ёки кимларнингдир «панд-насиҳати» таъсир қилганми – бу энди унинг виждонига ҳавола!

Алоҳида қайд этиш керак, журналистнинг ҳуқуқбузарлигига ўзининг иқрорию жабрланувчи М.Ҳамралиевнинг кўрсатмасидан бошқа далилнинг ўзи йўқ. Ҳолбуки, у куппа-кундузи, жамоат жойида (Фарғона вилояти ҳокимлиги биносининг шундоқ ёнида!) инспекторни «...уятли сўзлар билан сўкиб, бақир-чақир қилиб, фуқароларнинг осойишталигини бузганлик»да айбланган, бироқ «осойишталиги бузилган» бирорта гувоҳ йўқлигига қармай, суд боси-и-и-б жазо берворганига аввалги мақоламизда алоҳида урғу берилганди...

Журналистнинг «иши»га боғлиқ шу ва шу каби сирли-синоатли ҳолатларга яқин келажакда ойдинлик киритилишига умид қилиш мумкин ҳозирча.

Эслатиб ўтамиз, Фарғона вилоят телерадиокопанияси мухбири Усмонжон Қодиров 27 май куни ижтимоий тармоқда нотўғри хабар тарқатгани учун вилоят ҳокими матбуот котиби Муҳаммаджон Обидовнинг «суҳбатига чақирилган», мулоқот жараёнида хатосини тан олиб, узр сўраган, унинг тазарруси акс этган лавҳани М.Обидов писандага тўла матн ила «Facebook»даги саҳифасига жойлаганди.

Шундан сўнг ёш журналист бир муддат «йўқолиб қолади», ўша куни (27 май) кечга яқин 15 суткага «кесилгани» эса кеча (28 май) маълум бўлади. Бу орада ёш журналистнинг у билан ҳаммаси жойида экани, зарур иш билан бандлиги ҳақидаги мурожаати ҳам тарқалишга улгуради (қай тарзда бу амалга оширилгани жумбоқ). Бугун (29 май), кўриб турганингиздек, фавқулодда тезкорлик билан ўтган кассация судида енгиллик берилиб, озодликка чиқариб юбориляпти...

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг