Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Аллоҳ менга яна имкон берди — Коронавирусдан тузалган бемор кечинмалари

Аллоҳ менга яна имкон берди — Коронавирусдан тузалган бемор кечинмалари

Куни кеча тўрт нафар ҳамюртимиз коронавирусдан тўлиқ ҳалос бўлиб, касалхонадан чиқишди. Ундан аввал эса яна 8 киши Вирусология илмий-тешириш институти клиникаси жамоаси томонидан соғлом турмуш сари кузатиб қўйилган эди.

Xabar.uz таҳририяти мана шу ҳамюртларимиздан бири билан суҳбатда бўлди. Дахлсизлик нуқтаи-назаридан ҳамсуҳбатимизнинг исми-шарифини келтирмасликка қарор қилдик.

«Менинг ҳаётим энди роппа-роса иккига бўлинади — коронавирусга қадар бўлгани ва ундан кейингиси. Бу касаллик ҳаммасини ўзгартириб юборди — ҳаётга қарашларим, ниятларим, интилишларим. Аллоҳ менга иккинчи имкониятни тақдим этди.

Коронавирус ҳақида декабр ойида интернет сайтлардан ўқиб билгандим. Ўшанда бу касаллик Ўзбекистонга кириб келиши ва менга йўлиқишини тасаввур ҳам қила олмагандим. Ҳаммаси бир пасда ўзгариб кетди.

Касаллик менга хориждан келган танишим билан мулоқот натижасида юқди. Коронавирусга чалинганимни эса карантинда изоляция қилинганимдан сўнг, шифокорлар назорати остида билдим. Хориждан келган танишимда касаллик аниқлангани ҳамоно у билан мулоқотда бўлган ҳаммани карантинга олиб бўлишган эди. Мен ҳам ҳамма қатори изоляцияга олиндим.

Касаллик аввало иситма орқали ўзини билдирди. Иссиғим чиқиши билан дарҳол шифокорларга айтдим ва мендан анализ олишди. Ўша куннинг ўзида мени Вирусология илмий-тешириш институти клиникасига ётқизишди.

Иккинчи куни касаллик аломатлари аста-секин кўпая бошлади. Иситма борган сари кўтарилди. Дори ичганимдан кейин бир-икки соатга тушардию, яна қайта кўтарилиб кетарди. Икки марта қайт қилдим ва йўтал ҳам кучайди.

Учинчи куни иситма жуда кучайди, 39-40 даражагача кўтарилди. Мени реанимацияга олишди. Шундан кейин энг оғири бошланди. Тушкунликка тушиб қолдим, ҳеч кимга гапиргим ҳам келмасди, эшитгим ҳам. Бутун баданим қақшаб оғриди, иситмада ёниб кетаётгандек эдим. Бунақа вақтда ҳеч нарса кўнгилга сиғмай қоларкан.

Аммо бахтимга шифокорларим тушкунликка тушишмади. Уларга мингдан-минг раҳмат. Мени қўл силтаб қўяёзган ҳаётга улар қайтаришди. Реанимацияда ўтган икки кун мен учун ҳақиқий синов бўлди. Ўтган-кетганни эсладим, аввалги муаммоларим бу касалим олдида жуда кичкина бўлиб қолганди.

Бешинчи кун реанимациядан чиқаришди. Ўша куни менга иккинчи имконият берилганига ишондим. Иситма 37.2 даражага қадар кўтариларди ҳолос. Аста-секин тузала бошладим.

Олтинчи куни ўзимни яна ҳам яхшироқ ҳис қилдим.

Еттинчи куни касаллик аломатлари тўлиқ йўқолди.

Шундан кейин ҳам яна беш кун клиникада қолдим. Шифокорлар қайта-қайта анализ олишди, тўлиқ тузалганимга ишонч ҳосил қилиш учун бир неча марта чуқурлаштирилган текширувдан ўтказишди. Шундан кейин жавоб беришди. Ҳозир Республика ихтисослаштирилган терапия ва тиббий реабилитация илмий-амалий тиббиёт марказида икки ҳафталик кузатувда бўлиб турибмиз.

Тузалишимга сабабчи бўлган барчага — Ҳукуматимизга, масъулларга ва шифокорларимизга раҳматимни айтиб тугата олмайман. Ҳеч кимнинг бошига бунақа дардларни солмасин...»

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг