Хабарлар тезкор Телеграм каналимизда Обуна бўлиш ×

Бухоро ССБ туғуруқ пайтида вафот этган аёл юзасидан муносабат билдирди

Бухоро ССБ туғуруқ пайтида вафот этган аёл юзасидан муносабат билдирди

Ижтимоий тармоқларда бухоролик аёл фарзандини дунёга келтириш вақтида вафот этгани айтилган видеомурожаат тарқалди. Мурожаатда эркак мазкур воқеага тиббиёт ходимларининг эътиборсизлиги сабаб бўлганини айтади.

Бухоро вилояти соғлиқни сақлаш бошқармаси ушбу ҳолат юзасидан расмий муносабат билдирди.

Бошқарманинг билдиришича, марҳума З.Очилова 1992 йилда Қоракўл туманида туғилган.

У 2024 йил 12 декабр соат 21:50 да кучли шамоллаш аломатлари – йўтал, юқори тана ҳарорати, қоғоноқ сувларининг кетиши ҳамда умумий ҳолсизлик ҳолатида РИО ва БСИАТМ ДМ Бухоро филиали (Перинатал марказ)га қабул қилинган.

Беморда ушбу ҳомиладорлик камқонлик фонида кечган. Ҳомиладорликнинг 14 ҳафталик муддатида (2024 йил 14 июнда) жигар эхинококи ташхиси билан оператив даволанган.

Керакли барча клиник лаборатор, инструментал текширувлар ўтказилган. Керакли мутахасислар (пульмонолог, терапевт) консультацияси ўтказилган. Рентгенографияда ўнг томонлама бронхопневмония аниқланган.

Шундан сўнг мутахассислар томонидан консилиум асосида З.Очиловага стандартларга кўра керакли даво буюрилган, кузатув давом эттирилган. Аёлда туғруқ миллий стандарт асосида олиб борилган, оператив туғруққа кўрсатма бўлмаган.

13 декабр куни тана ҳароратининг 38 даражагача кўтарилиши кузатилган. Керакли дорилар буюрилган. Келишилган шифокорлар консилиумидан кейин тор мутахассислар пульмонолог ва жарроҳ шифокор кўруви ташкил қилинган. 

Ўша куни соат 12:30да эса мунтазам туғуруқ дардлари, 14:25да жадаллашган туғуруқ кузатилган.

Вазни 4,1 кило бўлган қиз жинсли чақалоқ туғилганидан сўнг аёл 250мл қон йўқотган ва бачадон гипотонияси кузатилган. Шу пайтнинг ўзида аёл аҳволи бирдан ёмонлашиб нафас етишмовчилиги белгилари кузатилган. Тери қопламлари рангпар тусга кириб, цианоз пайдо бўлган.

Зудлик билан реаниматологлар ва керакли мутахассислар чақирилган.

Бемор сунъий нафас аппаратига уланган ва интенсив реанимацион чора-тадбирлар бошланган. Беморда кардиомониторда юрак фибриляцияси аниқланган. Юрак фаолиятини тиклаш ва фибриляцияни олдини олиш мақсадида керакли препаратлар қўлланган. Пульс периферияда аниқланмаган. Юрак фаолиятини тиклаш мақсадида дефибриляция ва юрак бевосита массаж қилинган.

Соат 15:05да бемор аҳволи оғирлашиб, нафас етишмовчилиги, тери цианози кучайган. Аммо 40 минутлик ўтказилган ўпка-юрак реанимацион чора-тадбирлари натижасида юрак фаолияти тикланмаган. Аёлда ўша куни соат 15:15да биологик ўлим қайд қилинган.

Марҳума Суд тиббиёт экспертизасидан ўтказилган ва ўлим сабаби қоғоноқ сувлари эмболияси экани тасдиқланган.

Ҳолат юзасидан Бухоро давлат тиббиёт институтининг профессор-мутахассислари иштирокида хизмат текшируви ўтказилган ва Республика ихтисослаштирилган Она ва бола саломатлиги илмий-амалий тиббиёт марказининг мутахассислари иштирокида чуқур муҳокама қилинган.

Тиббий ҳужжатлар юритилишида хато ва камчиликларга йўл қўйган ходимлар - марказ 2-туғруқ бўлими мудири С.Рабиевга ҳамда даволовчи акушер-гинеколог З. Мусиновага ўртача ойлик маошидан 30 фоиз жарима қўлланилиб, бошқа бўлимга ротация қилинган.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг