Хабарлар тезкор Телеграм каналимизда Обуна бўлиш ×

Вакцина ишлаб чиқувчилар Трампнинг босимидан қўрқишмоқда

Вакцина ишлаб чиқувчилар Трампнинг босимидан қўрқишмоқда

Фото: «Cherkessk.sm-news.ru»

Коронавирусга қарши вакцина ишлаб чиқувчилар уларнинг ишига сиёсат аралашаётганидан ҳайиқишмоқда: Америка етакчиси Дональд Трамп уларга босим ўтказиши мумкин. Бу ҳақда «The New York Times» Оқ уйдаги манбаларига таяниб хабар берган.

Таъкидланишича, АҚШ ижтимоий хизмат ва соғлиқни сақлаш вазирлиги апрель ойида пандемияга қарши курашишнинг энг яхши йўли COVID-19 вакцинасини эртароқ ишлаб чиқиш эканлигини маълум қилганди. Уни 2020 йил октябрда ишлаб чиқишни ваъда берганди. Бу Трампнинг ноябрда бўлиб ўтадиган президент сайловларигача «вирусни жиловлаш» хоҳишига тўла мос келарди. Бироқ муддатни кечиктиришга тўғри келди: энди 2020 йилнинг охири — 2021 йилнинг бошларида миллионлаб доза вакцина ишлаб чиқиш режалаштирилмоқда.

Ҳукуматдаги экспертлар Трамп тезроқ дори ишлаб чиқариш учун озиқ-овқат ва дори-дармон сифатини назорат қилиш бошқармасига (FDA) босим ўтказиши мумкинлигидан чўчишмоқда. Чунки бу сайловда ғалаба қозониш учун керак: президент вакцинани сайловчиларга «сюрприз» қилмоқчи. Экспертларнинг фикрича, натижада у вирус ҳақида етарли бўлмаган маълумотларга эътибор бермаслиги ва сифатсиз вакцинани чиқариши мумкин.

«The New York Times»нинг ёзишича, Америка етакчиси чиндан ҳам вакцина ишлаб чиқувчиларни шоширмоқда. Чунки Трамп Шимолий Каролинадаги биотехнологик лабораторияга бориб, у ерда дорини рекорд даражада қисқа фурсат ичида чиқаришга ваъда берди. Бундан ташқари, у FDA «ишини яхши уддалаётгани» ва препаратни «муддатидан анча эрта» ишлаб чиқишга улгуришини бир неча бор таъкидлаган. Газетанинг ёзишига қараганда, буларнинг бари фармацевтика компанияларини боши берк кўчага киритиб қўяди: улар маъмурият талаблари билан тўлиқ текширилмаган вакцина ишлаб чиқаришга оид хавфсизлик масалалари ўртасида мувозанат сақлашга тўғри келади.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг