Польшалик маҳбуслар тиббий ниқоб тикиш ва дезинфекцияловчи суюқлик ишлаб чиқаришга киришди, деб хабар берди мамлакат адлия вазири ўринбосари Михал Вуйчик.

«Пенитенциар тизимнинг 24 та муассасасида тиббий ниқоб тикиш жараёни бошлаб юборилди», — дейди Вуйчик. Унинг айтишича, маҳбуслар бир ойда 800 мингта ниқоб тикиши мумкин.

Бундан ташқари, пенитенциар тизим корхоналаридан бирида махсус комбинезонлар ишлаб чиқарилиб, госпиталларга юборилади.

Шунингдек, маҳбуслар дезинфекция учун махсус суюқлик ишлаб чиқаришга киришишлари мумкин. «Қамоқхоналардан бирида махсус ишлаб чиқариш линиясини ишга тушириб, у ерда ойига 80 минг литр дезинфекцияловчи воситалар ишлаб чиқарилади», — дейди вазир ўринбосари.

«Буларнинг бари маҳбуслар томонидан бажарилади. Бу бизнинг — адлия вазирлиги ва пенитенциар тизимнинг коронавирус эпидемиясига қарши курашдаги ҳиссамиз бўлади», — дея таъкидлаган у.

Вуйчикнинг сўзларига кўра, тиббий ниқоб, комбинезон ва дезинфекцияловчи суюқликларни ишлаб чиқариш учун бир неча юзта маҳбус ишга жалб этилган. Маҳбуслар томонидан тикилган тиббий ниқоблар ҳуқуқни муҳофаза қилиш органларига ҳам, госпиталларга ҳам юборилади.

Айни вақтда Польшада эпидемия тартиби жорий қилинган. Сўнгги маълумотларга кўра, коронавирус 2554 кишида аниқланган, улардан 43 нафари вафот этган. Польша ҳукумати коронавирус тарқалиши билан боғлиқ равишда чет элликлар учун чегараларни ёпиш, Шенген ҳудудига кирувчи мамлакатлар билан чегараларни назорат қилишни тиклаш, халқаро авиа- ва темирйўл алоқаларини тўхтатиш, одамлар ҳаракатини чеклаш, болалар боғчаси, мактаб, университет, кўнгилочар муассасалар, жамоат овқатланиш жойлари, сартарошхона, маникюр салони, озиқ-овқат маҳсулотларидан бошқа дўконларни ёпишга қарор қилди.