Қирғизистонда эпидемиологик вазият оғирлашгани муносабати билан 1 июлдан пойтахт Бишкекда карантин чоралари кучайтирилди, деб хабар берди «Кyrgyztoday».

Бу ҳақда Бишкек мэри Азиз Суракматов маълум қилган.

Жамоат транспорти ва таксилар (иш кунлари эрталаб соат 07:00 дан 10:00 гача, кечки соат 17:00 дан 21:00 гача ишлайди, дам олиш кунлари бутунлай тўхтатилади), кафе ва ресторанлар, дўкон ва бозорлар, истироҳат боғлари ва хиёбонлар учун вақтинча чекловлар жорий этилди. Клуб ва барлар, болалар кўнгилочар муассасалари, футбол ва бошқа ўйин майдонлари ёпилди.

Мамлакат бош вазири Кубатбек Боронов қатор ўқув юртлари тураржойлари ҳамда «Манас» аэропортида беморлар учун палаталар ташкил этилаётганини маълум қилган.

Ҳолат шу даражадага етдики, врачлар етишмовчилиги муаммосини ординатурада ўқиётганлар ва тиббиёт институтларининг юқори босқич талабаларини сафарбар этиш ҳисобига ҳал этишмоқчи.

Қирғизистонда пандемия даврида коронавирусни юқтирганлар жами сони 6261 нафарга етди, даволанаётганлар сони 3665 нафар, қурбонлар сони — 66 нафар. Кечанинг ўзида 439 нафар, бугун 526 нафар янги бемор қайд этилганининг ўзиёқ мамлакатдаги эпидемиологик ҳолат қанчалик жиддийлигидан далолат беради.