Аввал маълум қилинганидек, бугун АОКА ҳузуридаги штабда Санитария-эпидемиология осойишталик агентлиги директорининг биринчи ўринбосари Ботир Қурбонов иштирокида брифинг бўлиб ўтди.

Унда муҳим савол ва мурожаатлар юзасидан жавоб қайтарилди.

— Хоразм вилоятида коронавирус инфекцияси қайд этилгани тўғрисидаги хабарларга изоҳ берсангиз?

— 2020 йил 5 июнь соат 12:00 ҳолатига кўра, Хоразм вилоятида янги касалланиш қайд этилмаган.

Вилоятда эпид мавсум давомида 233 нафар фуқарода касаллик қайд этилган ва уларнинг барчаси даволаниб шифохонадан чиқарилган.

2020 йил 2 июнь куни Санитария-эпидемиологик осойишталик агентлигининг тегишли таснифига асосан Хоразм вилоятининг барча шаҳар ва туманлари «Яшил ҳудуд» тоифасига киритилган.

— Дунё давлатлари тоифаларга ажратилиб, авиапарвозлар тикланиши қанчалик рост?

— Транспорт вазирлиги билан ҳамкорликда хорижий давлатлардаги эпидемиологик вазият ҳисобга олиниб «яшил», «сариқ» ва «қизил» тоифаларга ажратиш ҳамда босқичма-босқич авиақатновларни тиклаш ўрганиб чиқилиб, таклифлар тайёрланмоқда.

Бу борада Республика махсус комиссияси якуний хулосаси тўғрисида ахборот берилади.

— 2020 йил 4 июнь куни СЭОАнинг расмий саҳифаларида туман ва шаҳарларнинг тоифалар бўйича янгиланган рўйхати эълон қилинди. Энди Республика махсус комиссияси эмас, Агентлик томонидан ҳудудлар тоифаларга ажратиладими?

— Республика махсус комиссиясининг 2020 йил 29 майдаги йиғилиш баёни билан Санитария-эпидемиологик осойишталик агентлигига туман (шаҳар)ларнинг тоифаларини ўзгартириб бориш вазифаси юклатилган.

Шундан келиб чиққан ҳолда, жорий йил 2 июнь ҳолатига кўра, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан киритилган таклифлар, беморларни бутунлай соғайиши ҳамда эпидемик вазиятни эътиборга олиб Санитария-эпидемиологик осойишталик агентлиги томонидан туман (шаҳар)ларнинг тоифаларини ўзгартирилди.

Эндиликда шу тартибда ҳар ҳафтада ўзгартириш ишлари тизимли олиб борилади.

— 15 июндан карантин тадбирлари тўлиқ тугайдими?

— Карантин тадбирлари тугатилиши ёки бир муддат чўзилиши — коронавирус инфекцияси билан боғлиқ эпидемик вазиятни эътиборга олган ҳолда белгиланади.

Агарда касаллик бўйича барқарорликка эришилса, карантин тадбирлари бекор қилинади, касаллик ўсиш сурати жадаллашса, карантин тадбирлари ҳам кучайтирилади.